काठमाडौँ: प्रमुख प्रतिक्षी दल कांग्रेसले भूकम्पपीडितलाई आवास निर्माण गर्न एकमुष्ट रुपमा दुई लाख वितरणसम्बन्धी सरकारी लिखित प्रतिबद्धताको माग दोहोर्याएर संसद् अवरुद्ध गर्दा प्रधानमन्त्री केपी शर्मा ओलीले सम्बोधन गर्न पाएनन् ।
कांग्रेसले भूकम्पपीडितलाई घर बनाउन वार्षिक दुई प्रतिशत ब्याजदरमा १५ रु २५ लाख वितरण गर्न पनि सरकारसित आग्रह गरेको छ । यी दुवै निर्णय आफ्नो सरकारको पालामा भएको जिकिर गर्दै कांग्रेसले संसद्मा निरन्तर अवरोध खडा गरेको हो ।
सदनको आजको बैठक पनि सुरु हुनेबित्तिकै कांग्रेसका अर्जुननरसिंह केसीले सरकारले भूकम्पपीडित जनताको कष्टप्रद जीवनमाथि खेलबाड गरेको आरोप लगाए ।
उनले भूकम्प गएको १४ महिना बितिसक्दा पनि भूकम्पपीडित त्रिपालमुनि गुजारा गरिरहेको प्रति सरकार संवेदनशील बन्न नसकेको आरोप लगाउँदै सरकार यस्ता जनतालाई राहत होइन, आहत दिन लागिपरेको बताए ।
भूकम्पपीडितलाई राहत दिन राज्यको ढुकुटी गैह्रसरकारी संस्थालाई राष्ट्रिय पुनःनिर्माण प्राधिकरणले वितरण गरेको आरोप पनि नेता केसीले बताए ।
सोही दलका मोहनबहादुर बस्नेतले एकमुष्ट, बिनाझन्झट दुई लाख घर निर्माण गर्न ३० लाख भूकम्पपीडितले माग गर्दा सरकार किन नसुनेको जस्तो गरिरहेको छ भन्ने प्रश्न गर्दै सरकारको नियत भूकम्पपीडितमाथि राजनीति गर्ने देखिएको बताए ।
उनले दुई वर्षात्को समय जान लागिसक्यो, पीडित जनताले कति खुला आकाशमुनि बिताउने भन्ने प्रश्न गर्दै छिटो एकमुष्ट दुई लाख वितरण गर्न सरकारसित माग गरे ।
सो दलका प्रमुख सचेतक चीनकाजी श्रेष्ठले सरकारले भूकम्पपीडित जनतालाई घर बनाउन एकमुष्ट रुपमा दुई लाख दिने सरकारी प्रतिबद्धता नआएसम्म सदन चल्न नसक्ने जानकारी दिए । उनीहरुले आआफ्ना आसनबाट उठेर नै आआफ्ना भनाइ राखेका थिए ।
यसबाट प्रधानमन्त्री केपी शर्मा ओलीले सदनमा सम्बोधन गर्न पाएनन् । प्रधानमन्त्री ओली प्रमुख प्रतिपक्षी दलले उठान गरेको मागलाई सम्बोधन र हालै अफगानिस्तानको राजधानी काबुलमा नेपालीमाथि भएको घटना तथा यसमा सरकारको गरेका कामका बारेमा सदनलाई जानकारी दिन उपस्थित भएका थिए ।
प्रमुख प्रतिपक्षी दलले सदन अवरोध गरेपछि उनले सम्बोधन गर्न नपाएका हुन् । सभामुख ओनसरी घर्तीले प्रधानमन्त्री काबुल घटना र पुनःनिर्माणबारे सविस्तार जानकारी दिन प्रमले बोल्न खोजेको जानकारी गराएकी थिइन् ।
प्रमुख सचेतक श्रेष्ठले काबुलको घटनाप्रति सिङ्गो देश नै संवेदनशील छ भन्दै सो घटनासित आफ्ना मागलाई नजोड्न आग्रह गरेका थिए । प्रमुख प्रतिपक्षी दलका सांसद आ–आफ्ना आसनमा उठिरहेपछि आजै एक घन्टाका लागि सदन स्थगन गरिएको थियो । दोस्रो पटक १ बजे बसेको बैठकमा पनि कांग्रेस अवरोध गरेको छ।
सदनको आजको दैनिक कार्यसूचीमा कानुन, न्याय तथा संसदीय मामिलामन्त्री, उद्योगमन्त्री र शिक्षामन्त्रीले छुट्टाछुट्टै विभिन्न विधेयक प्रस्तुत गर्ने रहेको थियो ।
यसैगरी विनियोजन विधेयक अन्तर्गत सूचना तथा सञ्चार, स्वास्थ्य, भूमिसुधार तथा व्यवस्था, कृषि विकास, उद्योग, कानुन न्याय तथा संसदीय मामिला र युवा तथा खेलकुद विषयमा छलफल गर्ने कार्यसूची थियो । रासस
प्रतिक्रिया दिनुहोस !
