काठमाडौंः विश्व च्याम्पियन जर्मनी फ्रान्समा जारी युरोकप फुटबल प्रतियोगिताको क्वार्टरफाइनलमा पुग्न सफल भएको छ ।
पेरिसमा भएको खेलमा स्लोभाकियालाई ३–० गोलअन्तरले पराजित गर्दै जर्मनीले सजिलै अन्तिम आठको यात्रा तय गरेको हो ।
जर्मनीले पहिलो हाफको सुरुमै अग्रता लियो । स्लोभाकियाको डी बक्सबाट निस्केको बललाई डी बक्स बाहिरबाट खेलको आठौं मिनेटमा कडा प्रहार गर्दै जेरोमे बोटेङले पहिलो गोल गरे ।
त्यसपछि खेलको १३ औं मिनेटमा पाएको पेनाल्टीलाई मेसुट ओझिलले प्रहार गरेपनि स्लोभाकियाका गोल किपर माटुस कोजासिकले उत्कृष्ट बचाउ गरे ।
तर खेलभरी ५९ प्रतिशत बल पोजिसन बनाएको जर्मनीले ४३ औं मिनेटमा अर्को गोल गर्यो । यो पटक मारियो गोमेजले गोल गर्दै अग्रता २–० मा पुर्याए ।
पहिलो हाफमा २–० को अग्रता लिएको जर्मनीले दोस्रो हाफमा एक गोल थप्यो । खेलको ६३ औं मिनेटमा जुलियन ड्रयाक्सलरले गोल गर्दै जर्मनीको क्वार्टरफाइनल यात्रा पक्का गरे ।
अब जर्मनीले इटाली र स्पेनबीच राति भोलि राति हुने स्पेन र इटालीबीचको खेलको बिजेतासँग क्वार्टरफाइनलमा प्रतिस्पर्धा गर्नेछ ।
आजै साँझ भएको अर्को क्वार्टरफाइनल खेलमा आयोजक फ्रान्सले आयरल्यान्डलाई २–१ ले पराजित गर्दै अन्तिम आठको यात्रा तय गरिसकेको छ।
प्रतिक्रिया दिनुहोस !
