कानुन नै खारेज भएको अपराधमा जेल पुगे वृद्ध दम्पती
राजविराजः ३३ वर्षअघि भएको एउटा अपराध जसलाई अहिलेको कानुनले अपराध मान्दैन्, मुलुकी ऐनमा रहेको ‘जारी’ महल नै खारेज भइसकेको छ । यो अवधिमा पञ्चायतबाट बहुदल हुँदै गणतन्त्र आएर घोघनपुर गाविस कञ्चनरुप नगरपालिका बनिसकेको छ ।
यही साविक घोघनपुर–२ का एक बृद्ध दम्पती भने ३३ वर्षअघिको जारी मुद्दामा हालै पक्राउ परेपछि कैदसजाय भोग्न कारागारमा थुनिएका छन् ।
जिल्ला अदालतबाट खटिएका कर्मचारीको टोलीले ६७ वर्षीय रोजित मियाँलाई गत सोमबार र उनकी पत्नी ६४ वर्षीया हरीहरवती बाँतरनीलाई बिहीबार पक्राउ गरेको हो ।
उनीहरु दुबैजनामाथि जिल्ला अदालतले ३२ वर्षअघि जनही एक हजार जरिवाना र एक महिना कैद सजायको फैसला गरेको थियो ।
पश्चिमी कोशी नहरमा मिस्त्री काम गर्ने मियाँले जनमजदुरी गर्ने बाँतरनीलाई ०४० साउन १ गते श्रीमति बनाई भगाएका थिए ।
घटनापछि बाँतरनीका पहिलो पति श्यामसुन्दरका तर्फबाट वारेस भई उनका बुवा खप्सु सरदारले सम्पतिसहित अर्काकी पत्नी भगाउने र भाग्नेलाई कारवाहीको माग गर्दै ०४० साउन २ गते जिल्ला अदालतमा ‘जारी’ मुद्दा दर्ता गराएका थिए ।
कैद र जरिवाना असुल गर्ने उद्देश्यले चलाइएको अदालतको फैसला कार्यान्वयन विशेष अभियानअन्र्तगत अदालतका कर्मचारी र प्रहरीले फैसला भएको ३२ वर्षपछि उनिहरुलाई घरबाटै पक्राउ गरी कारागारमा थुनामा पठाएका हुन् ।
उनीहरुले जरिवानास्वरुप एक हजार तिरेका छन् भने एक-एक महिना कैद भुक्तान गर्न कारागारमा थुनिएका छन् ।
पत्नी लैजाने जारलाई कारबाही गर्न र अर्कोसंँग विवाह गरेर गएकी पत्नीले लगेको धनमाल फिर्ता पाऊँ भनी माग गरेर अदालतमा नौ महिना अघि ‘जारी’ मुद्दा दर्ता गराइन पाइन्थ्यो ।
अर्काकी पत्नी भगाउने जारलाई एक महिनादेखि दुई महिनासम्म कैद र १ देखि २ हजार रुपैयाँसम्म जरिवाना गर्न सक्ने कानुनी व्यवस्था पनि थियो ।
अर्कोतिर ऐनमा पत्नीले दोस्रो विवाह गर्नासाथ पहिलो पतिसँग स्वतः सम्बन्ध विच्छेद हुने प्रावधान समेत छ ।
लैङ्गिक समानता कायम गर्न तथा लैङ्गिक हिंसा अन्त्य गर्ने सम्बन्धमा केही नेपाल ऐनलाई संशोधन गर्न बनेको ऐनले गत असोज १४ गते मुलुकी ऐनबाट ‘जारी’ महल नै खारेज गरिसकेको छ ।
तथापि ‘जारी’ महल खारेज हुनुअघिकै मुद्दामा फैसला भएकोले बृद्ध दम्पतीबाट कैद, जरिवाना असुल गर्न कारागारमा पठाइएको तहसिलदार किरण कुमार सिंहले बताए ।