विश्व फुटबलमा नेपाल ६ स्थान खस्कियो
काठमाडौँ: फिफा वरीयतामा नेपाल ६ स्थान खस्कँदै एक सय ८८औं स्थानमा झरेको छ । विश्व फुटबल महासंघ (फिफा)ले बिहीबार सार्वजनिक गरेको पछिल्लो वरीयतामा नेपाल ६ स्थान खस्किएको हो ।
दक्षिण एसियाली राष्ट्रमा नेपाल पाँचौं स्थानमा छ । दक्षिण एसियाली देशको शीर्ष स्थानमा रहेको अफगानिस्तान समग्रमा एक सय ५०औं स्थानमा छ । दोस्रो स्थानमा रहेको भारत एक सय ५२औं, तेस्रो स्थामना आसीन माल्दिभ्स एक सय ७४औं स्थानमा छ ।
यसैगरी चौथो स्थानमा रहेको बंगलादेश एक सय ८३औं स्थानमा छ । छैटौं स्थानमा रहेको भुटान समग्रमा एक सय ९२औं स्थानमा छ । श्रीलंका एक सय ९३औैं स्थानका साथ सातौं र पाकिस्तान एक सय ९४औं स्थानका साथ आठौं स्थामना छन् ।
यसैगरी वरीयतामा वेल्सले महत्वपूर्ण छलाङ मर्दै समग्रमा ११औं स्थानमा उक्लिएको छ । हालै सम्पन्न युरोकपको सेमफिाइनलमा पोर्चुगलसँग पराजित भएको वेल्सले एक महिनाको दौरानमा १५ स्थान सुधार गरेको हो । वेल्स युरोकपमा पहिलो सहभागी टोली हो ।
यसैगरी युरोकपमा उपविजेता बनेको फ्रान्स १० स्थान सुधार गर्दै सातौं स्थानमा उक्लिएको छ । वेल्स र फ्रान्सलाई वरीयता सुधारका लागि युरोकपको प्रदर्शनले सहयोग गरेको हो ।
यसैगरी युरोकपको फाइनलमा आयोजक फ्रान्सलाई हराएको पोर्चुगलले पनि वरीयतामा दुई स्थान सुधार गरेको छ । पोर्चुगल समग्रमा छैटौं स्थानमा छ। स्पेन र ब्राजिल दुई स्थान तल झरेका छन् । स्पेन आठौं र ब्राजिल नवौं स्थानमा छन् ।
उरुग्वे १२औं स्थानमा छ भने दुई स्थान खस्किएको इङ्ल्यान्ड १३औं स्थानमा पुगेको छ । वरीयताको शीर्ष पाँचमा रहेको देशको कुनै पनि परिवर्तन भएको छैन । शीर्ष स्थानमा अर्जेन्टिना यथावत् छ । दोस्रोदेखि पाँचौं स्थानमा क्रमशः बेल्जियम, कोलम्बिया, जर्मनी र चिली छन् ।
प्रतिक्रिया दिनुहोस !
