काठमाडौं : मन्त्रिपरिषद्को बिहीबारको बैठकले २ करोड ९७ लाख १० हजार नगद पुरस्कार प्रदान गर्ने निर्णय गरेको छ । राष्ट्रिय खेलकुद परिषद् (राखेप) ले युवा तथा खेलकुद मन्त्रालयमार्फत पेश गरेको प्रस्तावलाई मन्त्रिपरिषद्ले अनुमोदन गरेसँगै १९औं एसियाली खेलकुद र चौथो एसियाली पारा खेलकुदका पदक विजेता खेलाडी तथा प्रशिक्षकका साथै नेपाली राष्ट्रिय पुरुष क्रिकेट टिमले नगद पुरस्कार पाउने भएका छन् ।
१९औं एसियाली खेलकुदमा नेपाललाई ऐतिहासिक रजत पदक दिलाउन सफल एरिका गुरुङले १९ लाख ५० हजार प्राप्त गर्ने छिन् । प्रमुख प्रशिक्षक कुशल श्रेष्ठले दुई लाख ३४ हजार, सहायक प्रशिक्षक छोरी डंगोल र वीरकृष्ण शाही तथा व्यवस्थापक निवासगोपाल वैद्यले जनही १ लाख ९५ हजार प्राप्त गर्ने छन् ।
एसियाली खेलकुदमा नै महिला कबड्डी टोलीले कांस्य पदक जितेको थियो । नेपाली राष्ट्रिय महिला कबड्डी टोलीका १२ खेलाडीले जनही ३ लाख ९० हजार, प्रमुख प्रशिक्षक पार्वती राईले २ लाख ६० हजार तथा सहायक प्रशिक्षक विष्णुदत्त भट्ट र व्यवस्थापक डिल्लीराम काफ्लेले जनही एक लाख ३० हजार रुपैयाँ पाउने छन् । कबड्डी टिमले मात्रै ४८ लाख १० हजार नगद प्राप्त गर्नेछ ।
यसैगरी चौथो एसियाली पारा खेलकुदमा कांस्य जितेकी तेक्वान्दो खेलाडी पलेशा गोवद्र्धनले १३ लाख रुपैयाँ पाउने छिन् । प्रमुख प्रशिक्षक कविराज नेगी लामाले दुई लाख ६० हजार र टिम व्यवस्थापक रामचन्द्र श्रेष्ठले एक लाख ३० हजार पाउने छन् ।
यसैगरी आईसीसी पुरुष
टीट्वेन्टी विश्वकपअन्तर्गत एसियाली छनोटमा दोस्रो भएको राष्ट्रिय क्रिकेट टिमले दुई करोड ४ लाख ७५ हजार रुपैयाँ नगद पुरस्कार प्राप्त गर्ने छ । १५ खेलाडीले जनही १३ लाख, प्रमुख प्रशिक्षक मोन्टी देसाईले तीन लाख ९० हजार, टिम व्यवस्थापक सुमनराज कार्की, सहायक प्रशिक्षक वसन्त शाही र फिजियो विक्रम न्यौपानेले जनही १ लाख ९५ हजार रुपैयाँ हात पार्ने छन् ।
पुरस्कार प्रदान गर्ने निर्णय गरेकोमा युवा तथा खेलकुद मन्त्री विराजभक्त श्रेष्ठ र राखेपका सदस्यसचिव टंकलाल घिसिङले नेपाल सरकार र अर्थ मन्त्रालयलाई धन्यवाद दिए ।
प्रतिक्रिया दिनुहोस !
