विमानस्थल विस्तार योजना पेश गर्न निर्देशन
काठमाडौंः त्रिभुवन अन्तर्राष्ट्रिय विमानस्थलको विस्तारमा भएको ढिलाइ र यसको आगामी कार्ययोजनाबारे एक महिनामभित्र प्रतिवेदन पेस गर्न संसद्को अन्तर्राष्ट्रिय सम्बन्ध र श्रम समितिले निर्देशन दिएको छ ।
समितिको बिहीबारको बैठकले विमानस्थल विस्तार गर्ने कार्यमा हाल उत्पन्न गतिरोध हटाउन ठोस उपायसहितको चालू योजना पूरा गर्न संस्कृति, पर्यटन तथा नागरिक उड्डयन मन्त्रालयलाई निर्देशन दिएको छ ।
समितिले विमानस्थल विस्तारको आवश्यक कार्ययोजना तयार गरी एक महिनाभित्र समिति समक्ष पेस गर्र्न निर्देशन दिएको समितिका सभापति प्रभु साहले जारी गरेको विज्ञप्तिमा उल्लेख छ ।
समितिले नेपाल नागरिक उड्डयन प्रधिकरण र मातहतका कार्यालयमा कार्यरत कर्मचारीलाई तोकिएको जिम्मेवारी तोकिएको समय र गुणस्तरमा सम्पादन नगर्नेलाई कानुनअनुसार कारबाही गर्न पनि पर्यटन मन्त्रलयलाई निर्देशन दिएको छ ।
मन्त्रालय र प्राधिकरण मातहतका कर्मचारीको सेवा सुविधाका सम्बन्धमा नेपाल नागरिक र यसका मजदुर संगठबीचको विगतका सहमति र सम्झौताको कार्यान्वयन गर्न पनि निर्देशन दिएको छ । समितिले बिहीबार पर्यटन मन्त्रालयका सचिव प्रेमकुमार राई, नेपाल नागरिक उड्डयन प्राधिकरणका महानिर्देशक संजिव गौतम, श्रम विभागका महानिर्देशकसहितका पदाधिकारीसँग छलफल गरेर आवश्यक निर्देशन दिएको पनि समितिले जारी गरेको विज्ञप्ति जारी गरेको छ ।
विमानस्थलको क्षमता विस्तार गर्ने जिम्मा पाएको ठेकेदार कम्पनीले दुई अर्ब ३१ करोड रुपैयाँको क्षतिपूर्ति मागेको सार्वजनिक भएपछि समितिले सम्बन्धित निकायलाई बोलाएरै छलफल गरेको जानकारी दिएको छ । विमानस्थल विस्तारको ठेक्का पाएको ठेकेदार कम्पनी सान्जोसे कन्ट्रक्टोराले त्रिभुवन विमानस्थलको विस्तार गर्न समयमा नै नसेको उल्लेख छ ।
विमानस्थलको क्षमता विस्तारका लागि सन् २०१३ को मार्ग १७ देखि काम सुरु गरेको स्पेनिस कम्पनी सान्जोसले प्राधिकरणसँग गरेको सम्झौताअनुसार काम गर्न नसकेको भन्दै क्षतिपूर्ति माग गरेको छ ।
यो कम्पनीले सन् २०१६ को मार्चभित्र काम सक्नुपर्ने भए पनि तीन वर्षको अवधिमा जम्मा १६ प्रतिशत मात्रै काम सम्पन्न गरेको छ । तीन वर्षको अवधिमा काम गर्न नसकेको जिम्मेवारी लिनुको साटो प्राधिकरणसँग उल्टै क्षतिपूर्ति मागेको थियो ।