फेरी खुल्दै चीन जोड्ने कोरला नाका

फेरी खुल्दै चीन जोड्ने कोरला नाका

पोखराः चीन र नेपाल जोड्ने मुस्ताङस्थित कोरला नाका केही दिनका लागि फेरि खुला हुने भएको छ । वर्षमा दुई पटक नाका खुलाउने परम्परा अनुरुप नै यसपालि फेरि नाका खुला हुन लागेको मुस्ताङका प्रमुख जिल्ला अधिकारी (सीडीओ) गणेश अधिकारीले जानकारी दिए ।

‘सीमाको गेट भदौ ४ गतेबाट खोल्ने भनिएको छ’, सीडीओ अधिकारीले अन्नपूर्णसँग भने, ‘अहिलेचाहिँ चिनियाँ आएर गेट र व्यापारिक मेलाका लागि स्टल बनाउँदै छन् । उनीहरुले गेट खोले पनि नेपाली र उताका स्थानीयको आउजाउ भएको छैन ।’ उनका अनुसार भदौ ४ बाट दुई हप्ताका लागि गेट खोल्न दुई पक्षीय कुराकानी भएको थियो ।

उत्तरी मुस्ताङको लोमन्थाङ गाविसका सचिव ज्ञानेन्द्र विष्टका अनुसार चिनियाँले खबर गरेर यताका स्थानीयलाई किनमेलका लागि डाकेका छन् । हिउँद याममा हिउँकै कारण स्थानीयलाई हिँडडुलमा समस्या हुने हुँदा नाका अहिल्यै खोलिएको गाविस सचिव विष्टले जानकारी दिए । उनका अनुसार चिनियाँले नाका बुधबारदेखि खोलेका हुन् ।

कोरला नाकामा चिनियाँको तारबार छ । गेटमा ताला पनि उनीहरुले नै लगाएका छन् । ताला खोलेर नेपालतिरका अधिकारीलाई उनीहरुले सूचित गरेका थिए । एक दसकभन्दा अघिदेखि सीमामा तारबार लगाएर चीनले कोरालामा गेट बन्द गरेको छ ।

चीनले मुस्ताङ सीमा क्षेत्र कोरला नाका असार १ गतेदेखि खुलाएको थियो । चीनले कोरलाको गेटमा ताला लगाउनु अघिदेखि नै यसरी मेला लाग्दै आएको हो।

‘अहिले नाकाभित्र छिरेर चीनबाट किनमेल गरी हिउँदका लागि सामान भण्डारण गर्ने हो’, गाविस सचिव विष्टले अन्नपूर्णसँग भने, ‘पोहोर नाका एकपटकमात्रै खुलेको थियो, यसपालि दुईपटक खुल्यो ।’  कोरला नाकाभन्दा ३ किलोमिटर पल्तिर चीनको तिब्बती भागमा व्यापार मेला लाग्छ । त्यही मेलामा स्थानीयले किनमेल गर्ने हुन् ।

कोरलाभन्दा ३० किलोमिटर पर तिब्बतको ढोंबासेन जिल्ला छ । त्यही जिल्लाका व्यापारी कोरला नजिक आएर व्यापार गर्नेछन् । मेलामा नेपालीले पनि आफ्नो स्टल बनाएर व्यापार गर्न पाउँछन् । तर, नेपालीले बेच्नेभन्दा किन्ने सामान धेरै हुँदै आएको छ ।

मेला लाग्ने बेला नेपालले पनि सीमा क्षेत्रको भन्सारलाई सक्रिय पार्ने जानकारी सीडीओ अधिकारीले दिए। हिउँद याममा अत्यधिक चिसो हुने र हिउँसमेत पर्ने हुँदा असार र असोजमा मेला लाग्दै आएको थियो । तर यसपालि असारमा मेला गरिकन फेरि भदौमा हुन लागेको छ ।

गाविस सचिव विष्टका अनुसार उपल्लो मुस्ताङका बासिन्दाले ६ महिनालाई पुग्ने गरी यिनै मेलाको अवसरमा सामान किनमेल गर्छन् । जोमसोम हुँदै कोरलासम्मै मोटरबाटो पुगेको भए पनि सामान ओसार्ने ट्रक गुड्न मिल्ने गरी सडक बनेको छैन ।


प्रतिक्रिया दिनुहोस !

लोकप्रिय

Unity

working together is no longer optional-it is a matter of compulsion

Annapurna Media Network has announced the Unity for Sustainability campaign which comes into force from January 1, 2022. The main aim of this campaign is to 'lead the climate change dialogue' working closely with all the stakeholders on sustainable development mode, particulary focusing on climate-change issues.