गार्इ पालेर स्थानीयलार्इ रोजगारी

इलाम: दुई वर्षअघि बरबोटेमा खुलेको नवरत्न अर्गानिक कृषि तथा पशुपालन केन्द्र पछिल्लो समयमा स्थानीयका लागि रोजगारीको केन्द्र बन्दै गएको छ । फार्ममा अहिले आठ जना स्थानीयले काम पाएका छन् ।

इलामको बिब्ल्याटे बजारबाट करिब एक किलोमिटरको दुरिमा माइपोखरी जाने बाटो नजिकै रहेको केन्द्रमा स्थानीय वीरबहादुर लिम्बु फार्म सरसफाइ र दाना पानीको काम गर्दछन् । १८ महिनादेखि फार्ममा काम गर्दै आएका उनले फार्म घर परिवार पाल्ने मेसो बनेको बताए ।

स्थानीय सुष्मा रसाइली पनि त्यही फार्ममा घाँस काट्ने काम गर्दछिन् । उनले दैनिक सात भारी घाँस काट्ने गरेको बताइन् । दैनिक सात घन्टा खट्ने उनीहरूले मासिक आठ हजार तलब पाउने गरेको बताए । नौ जना स्थानीयले एक करोडभन्दा बढीको लगानीमा केन्द्र स्थापना गरेका थिए । ठूलै सपना थियो त्यस बेला । अहिले पनि उत्साह घटेको छैन । एक वर्षदेखि यही पशुपालन केन्द्रमा घाँस काट्ने सानु पनि बिहान १० बजेदेखि ५ बजेसम्म घाँस काटेरै महिनाको नौ हजार कमाउँछिन् ।

केन्द्रमा बाछाबाछीसहित ५२ बटा गाई छन् । केन्द्रले अग्र्यानिक तरकारी पनि उत्पादन गर्ने गरेको केन्द्रका सञ्चालकले बताए । सबै युवा परदेश जानथालेकाले मुलुकमै सम्भावना छ भन्ने सन्देश दिन फार्म सञ्चालन गरेका केन्द्रका सदस्य गौतम गुरुङले बताए । अहिले यो केन्द्रबाट दैनिक दुई सय लिटर दूध उत्पादन हुने गरेको छ । यहाँ प्रतिलिटर ४० रुपैयाँमा दूध बिक्री हुने गरेको छ । नबिकेको दूधबाट छुर्पी, घीउ, दही, पनिरलगायत बनाउने गरिएको छ ।

७० रोपनी क्षेत्रमा फैलिएको जमिनको घाँस र दानाको भरमा गाई पालेको गुरुङले बताए । सरकारले दुग्धजन्य पदार्थ बिक्री गर्न बजार व्यवस्थापन गर्न नसक्दा दूधको उचित मूल्य पाउन नसकिएको गुरुङको गुनासो छ ।

अहिले केन्द्रमा विभिन्न जातका गाई पालेको सञ्चालकले बताएका छन् । लामो समयको नाकाबन्दी र खडेरीले गर्दा केही समय भने गाईवस्तुलाई दानापानी र घाँसको समस्या भोग्नु परेको गुरुङको अनुभव छ । दूध मात्र बेच्नुभन्दा दूधबाट बन्ने गुणस्तरीय परिकार बेच्न सके अझ फाइदा हुने गौतम गुरुङको भनाइ छ ।