नेप्सेमा भारी गिरावट
काठमाडौंः सेयर बजारका लगानीकर्ता बिच्किएका छन् । पछिल्लो समय बजारमा बेस्सरी उतारचढाव आएपछि लगानीकर्ताको मनोबल घटेको हो । दुई सातायता नेप्सेमा करिब एक सय ८७ अंकले गिरावट आइसकेको छ । दिनहुँजसो बजार घट्नेक्रममा छ । आइतबार कबिर ४०.९४ अंकले झरेको नेप्से सोमबार पनि थामिन सकेन । लगानीकर्ता हतोत्साही भएपछि सोमबार पनि नेप्से ३९.१२ अंकले तल झर्र्यो ।
यतिबेला ठूला लगानीकर्ता ‘पर्ख र हेर' को अवस्थामा छन् । साना र नयाँ लगानीकर्ता भने निकै त्रसित देखिएका छन् । दुई सातायता बजारमा निकै ठूलो उतारचढाव आएपछि साना लगानीकर्ता तर्सिएका हुन् । दिनहुँजसो बजार घट्न थालेपछि जुनसुकै भाउमा पनि बिक्री गरेर निक्लिहाल्ने प्रवृत्ति देखिएको फ्रन्टलाइनमा बसेर काम गरिरहेका ब्रोकरहरूको भनाइ छ ।
पछिल्लो समय बजार निकै अस्थिर बन्दा साना लगानीकर्ता आत्तिएका छन् । बजार लगातारजसो बढेका बेला पसेका उनीहरू अहिले फेरि दिनहुँजसो घट्न थालेपछि आत्मबल गुमाउने अवस्थामा पुगेका हुन् । नेपाल इन्भेस्टर्स फोरमका सदस्य राजन लम्साल साना लगानीकर्ताको मनोबल गिर्दा बजार घट्न गएको बताउँछन् । ‘ठूला पर्ख र हेर' को अवस्थामा छन् । साना आत्तिएर बेच्न थालेका छन्', उनले भने ।
कतिपय ठूला लगानीकर्ताले १८८१ विन्दुबाट बुल फर्किएको भन्न थालेका छन् । यसपटकको बुलको उच्चतम विन्दु नै १८८१ हो । अब बजार बढे पनि त्यो विन्दुलाई पार गर्न सक्दैन भन्नेहरूको समूह अहिले बजारमा बढ्न थालेको छ । अर्का थरी लगानीकर्ताको समूह भने बजार अहिले करेक्सनको अवस्थामा रहेको र करेक्सन सकिएपछि फेरि फर्किएर नेप्सेले १८८१ विन्दुलाई पार गर्ने बताउँछन् ।
बजारको उच्चतम र न्यूनतम विन्दु कसैले पनि ठोकुवा गर्न सक्दैन । यतिबेला साना लगानीकर्ता भने सुरक्षित हुनुपर्ने बेला भएको छ । दुई सातायता बजारले एउटा निश्चित बाटो देखाउन सकेको छैन । प्रत्येक दिन निकै उतारचढाव भइरहेको छ । एकै दिन ३०-४० अंकको उतारचढाव आउने गरेको छ । पछिल्ला कारोबारमा सुरू चरणमा बजार बेस्सरी घट्ने, बीचमा घट्नेक्रम कम हुँदै जाने अनि फेरि अन्तिम चरणमा थप तल झर्ने प्रवृत्ति देखिएको छ । यस्तो प्रवृत्तिलाई विश्लेषकहरूले बजार अस्थिर भएको बताउने गरेका छन् । यस्तो बेला सेयर किन्दा फस्ने सम्भावना बढी हुन्छ । यो बियरिस ट्रेन्डको संकेत पनि हो ।
बजार बढ्दोक्रममा कारोबारको पहिलो चरणमा बजार बढ्ने, मध्यतिर केही घट्ने अनि फेरि अन्तिम चरणमा बजार बढेर बन्द हुने प्रवृत्ति बढी हुन्छ । घट्दोक्रममा बजारले बढेजस्तो गरेर झुक्याउने भएकाले लगानीकर्ता निकै सचेत हुन जरूरी छ । बढ्न लाग्यो भनेर किन्दा अर्को दिन झन् घट्न सक्ने भएकाले केही समय धैर्य गर्न बजारका ठूला लगानीकर्ता र विश्लेषकको भनाइ छ ।
सेयरमा बजारको मनोविज्ञान र ट्रेन्ड निकै महत्वपूर्ण पक्ष हुन् । ट्रेन्ड पत्ता लगाउन नसके लगानी डुब्ने सम्भावना बढी हुन्छ । पछिल्लो समय बजार लगातारजसो बढ्न थालेपछि घटाउन निकै चलखेल भएको थियो । केही लगानीकर्तालाई विगतमा झस्तै बजार लगातार घटेर निकै तल्लो विन्दुमा आउला भन्ने डर पनि छ । तर ठूला लगानीकर्ता र विश्लेषकका अनुसार नेप्से २०६५ पछिको जस्तो पेनिक अवस्थामा भने आउने देखिँदैन ।
अहिले सूचीकृत कम्पनीको वित्तीय अवस्था राम्रो छ । वाणिज्य बैंकको भाउमा खासै बुल आएको छैन । कमाई राम्रो भएको छ । अहिले बजारमा हजारौं नयाँ लगानीकर्ता थपिएका छन् । सामूहिक लगानी कोष तथा इन्भेस्टमेन्ट कम्पनी आएका छन् । जसका कारण आकर्षक मुनाफा दिने कम्पनीमा भाउ घटेपछि फेरि क्रेता आउने विश्लेषकको भनाइ छ ।
पछिल्ला दिनका कारोबारमा सुरु चरणमा बजार बेस्सरी घट्ने, बीचमा घट्नेक्रम कम हुँदै जाने अनि फेरि अन्तिम चरणमा थप तल झर्ने गरेको छ । यस्तो प्रवृत्तिलाई विश्लेषकले बजार अस्थिर भएको बताउने गरेका छन् । यो बियरिस ट्रेन्डको संकेत पनि हो ।
कालोधन छानबिनको कार्ड फालेपछि बजार तल झर्नेक्रम सुरू भएको हो । सोमबार बजारमापक नेप्से परिसूचक ३९.१२ अंकले घट्दा १६९४.८१ विन्दुमा आइपुगेको छ । बजार २.२६ प्रतिशतले तल ओर्लिएको हो । कुल एक अर्ब १९ करोड २९ लाख ४९ हजार सात सय ६९ रुपैयाँको सेयर कारोबार भयो । २४ लाख १७ हजार दुई सय पाँच कित्ता सेयर किनबेच भएको छ । लगानीकर्ताको सम्पति नाप्ने बजार पुँजीकरण १८ खर्ब ६८ अर्बमा झरेको छ ।