युवा वर्ष मोती पुरस्कार रमेश शुभेच्छु र गोविन्द नेपालीलाई

काठमाडौँ: राष्ट्रिय युवा सेवा कोशले यस वर्षको युवा वर्ष मोती पुरस्कार युवा साहित्यकार रमेश शुभेच्छु (पाँचथर) र गोविन्द नेपाली (जुम्ला)लाई दिने निर्णय गरेको छ । भदौ ६ गते पुरस्कार छनोट समितिका संयोजक प्रा.डा. चूडामणि बन्धूको संयोजकत्वमा बसेको बैठकले शुभेच्छु र नेपालीलाई संयुक्त रुपमा पुस्कार प्रदान गर्ने निर्णय गरेको हो ।

कोशले जारी गरेको विज्ञप्तिमा भनिएको छ, ‘नेपाली भाषा साहित्यको उत्थान र यसको श्रीवृद्धिका लागि विविध क्रियाकलाप र गतिविधि सञ्चालन गरी प्रशंसनीय योगदान दिए वापत साहित्यकारद्वयलाई सो पुरस्कारद्वारा पुरस्कृति गर्ने निर्णय गरेको हो ।’

कोशले २०४२ सालमा स्थापना भएको मोती पुरस्कार २०७३ का लागि शुभेच्छु र नेपालीलाई दिने निर्णय गरेको हो । पुरस्कारको राशी ५० हजार नगद, स्वर्ण पदक र प्रमाणपत्र रहेको छ । कोशले मोती पुरस्कार स्थापना कालदेखि नै प्रत्येक वर्ष ४० वर्ष ननाघेका युवा साहित्यकारलाई प्रदान गर्दै आएको छ ।

राष्ट्रिय विभूति युवा कवि मोतीराम भट्टको १५१ औँ जयन्तीको अवसरमा भदौ १६ गते पुरस्कार प्रदान गरिने राष्ट्रिय युवा कोशका अध्यक्ष भीमबहादुर अधिकारीले अन्नपूर्णलाई जानकारी दिए ।

पुरस्कार पाउने खबर सुनेपछि अन्नपूर्णसँग साहित्यकार शुभेच्छुले भने, ‘गर्दै गए हौसला र माया पाइने रहेछ । अनि निरन्तर गर्दै गए सम्मान पनि पाइने रहेछ ।’

पुरस्कार घोषणा हुँदा बैतडीमा रहेका नेपालीले अन्नपूर्णसँग खुशी साट्दै भने, ‘कर्णालीको गाउँमा जन्मिएर गरेको निरन्तरताको फल जस्तो लागेको छ ।’ नेपालीले अबको लेखन यात्रा अझ चुनौती थपिएको समेत सुनाए ।

को हुन् शुभेच्छु
रमेश शुभेच्छु सूर्यनाथ लुइटेल र पुण्यमाता लुइटेलको कोखबाट २०३५ साल चैत ३० गते पाँचथर जिल्लाको सुभाङ गाविस ९ भालुखोपमा जन्मिएका हुन् । प्राथमिक तहबाटै कविता सिर्जना सुरु गरेका शुभेच्छुको पहिलो कृति गजल संग्रह हो । आँसु नदेऊ मलाई (गजल संग्रह, २०५७)मा प्रकाशित भएपछि साहित्यमा औपचारिक यात्रा सुरु गरेका शुभेच्छुका सिर्जना र सम्पादन गरेर दर्जनौ कृति प्रकाशित छन् । शुभेच्छुका चर्चित सम्पादित कृतिमा मेची पद्यमाला (२०५९) , नेपाली गजलमा नारी हस्ताक्षर, २०६२ हुन्  ।

छन्द कवितामा विशेष कमल चलाउने शुभेच्छुका सिर्जनात्मक कृतिमा हजुरबा (शोककाव्य, २०५८), आमाको माया (बालकाव्य, २०६१), बगँैचा (कविता–गीत–गजल सङ्ग्रह, २०६५) लगायत कृति प्रकाशित छन् । ‘देवकोटाका महाकाव्यमा स्वच्छन्दतावाद’ शीर्षकमा विद्यावारिधिरत शुभेच्छु साहित्य सिर्जना सँगै प्राध्यापन र छन्द प्रशिक्षणमा सक्रिय छन् ।

को हुन् नेपाली
गोविन्द नेपाली स्व.मुने नेपाली र स्व.अमृता नेपालीको कोखबाट २०३६ साल कात्तिक ५ गते जुम्ला चन्दनाथ गाविस डाडाकोट गाउँ (हाल चन्दनाथ नगरपालि ४) मा जन्मिएका हुन् । 

माध्यमिक तह पढ्दैदेखि साहित्य सिर्जना गर्न थालेका नेपालीले १२ वटा साहित्यिक कृति प्रकाशन गरिसकेका छन् । नेपालीको कलम उपन्यास, कथा, गजल, कवितालगायतको विधामा सशक्त देखिन्छ ।

नेपालीको पहिलो कृति फाटोकोट (नाटक, २०६२) सालमा प्रकाशित भएको हो । नेपालीका ‘अञ्जान अप्सरालाई रविको पत्र (उपन्यास, २०६३) जागरुक डुसा (कविता संग्रह, २०६७),  कर्णाली दर्पण (कविता संग्रह, २०७०) रपचतहरकै चिनारी (कविता संग्रह, २०७२) चर्चित कृति हुन् । ‘दलितको सामाजिक संस्कार’ शीर्षकमा विद्यावारिधि गरिरहेका नेपाली सिर्जना यात्रामा सक्रिय छन् ।