पोखरा: पर्यटकीय सहर पोखरामा टुर द पोखरा २०१६ साइकल र्यालीको तयारी गरिएको छ । साइकल चढौं स्वास्थ्य, वातावरण र पर्यटनका लागि भन्ने नाराका साथ असोज ८ गते दोस्रो संस्करणको टुर द पोखरा हुन लागेको हो ।
साइकल सिटी पोखराको आयोजनामा हुने र्यालीमा स्वदेशी तथा विदेशी गरी हजारजना साइक्लिस्ट सहभागी हुने साइकल सिटी पोखराका अध्यक्ष प्रकाश बज्राचार्यले जानकारी दिए ।
पोखराको फेवातालबाट सुरु हुने र्याली पोखरा र लेखनाथ नगरपालिकाका विभिन्न स्थान हुँदै २८ किलोमिटर दूरी पार गरी वेगनाश तालमा पुगेर समापन हुने कार्यक्रम रहेको अध्यक्ष बज्राचार्यले जानकारी दिए । कार्यक्रम सम्पन्न गर्न ११ लाख ५० हजार रुपैयाँ लाग्ने अनुमान गरिएको कार्यक्रमका संयोजक निरज थापाले बताए ।
पोखराको पर्यटन प्रवद्र्धनका लागि पनि साइकल र्यालीजस्ता कार्यक्रम महत्त्वपूर्ण हुने नेपाल उद्योग वाणिज्य महासंघका पूर्वअध्यक्ष आनन्दराज मुल्मीले बताए । टुर द पोखरा साइकल र्यालीलाई अन्तर्राष्ट्रिय रूपमा प्रवर्द्धन गर्न आगामी दिनमा विशेष पहल गरिनुपर्ने उनले बताए । र्यालीमा पोखरामा रहेर विभिन्न संस्थामा काम गर्ने विदेशी, पोखरा घुम्न आएका पर्यटक पनि सहभागी हुने बताइएको छ ।
पोखरामा २०१८ सालमा साइकल भित्रिएको साइकल सिटी पोखराका अध्यक्ष बज्राचार्यले जानकारी दिए । साइकल सिटीमा एक सय तीन साइक्लिस्ट आबद्ध छन् । पछिल्लो समयमा पोखराका युवतीमा साइकलप्रति आकर्षण बढ्दै गएको उनले सुनाए ।
प्रतिक्रिया दिनुहोस !
