अब गंगालालको सेवा बाहिर पनि
काठमाडौंः मुलुकभर बढ्दो मुटुरोगका बिरामीको चाप बाँसबारीस्थित सहिद गंगालाल हृदय केन्द्रलाई थेग्न हम्मे परेपछि सरकारले उक्त केन्द्रले दिने सेवा तत्काल उपत्यकाबाहिर विस्तार गर्ने र केन्द्रलाई दीर्घकालीन रूपमा प्रतिष्ठानको स्वरूप दिने निर्णय गरेको छ ।
स्वास्थ्यमन्त्री गगन थापाको अध्यक्षतामा केन्द्र सञ्चालक समितिको मंगलबार बसेको बैठकले मन्त्रालयको सहकार्य र उक्त केन्द्रको प्राविधिक सहयोगमा उपत्यका नजिकै र सकेसम्म सरकारी अञ्चल अस्पतालहरूमा मुटुरोगसम्बन्धी विशेषज्ञ उपचार सेवा विस्तार गर्न प्रक्रिया अघि बढाउने निर्णय गरेको हो ।
मुलुकभरबाट रिफर भई आउने बिरामीको संख्या गंगालालमा अत्यधिक बढेको र उनीहरू सबैलाई समयमै सेवा दिन कठिनाइ भएको भन्दै सरकारले उक्त केन्द्रको सेवा विस्तार गर्न प्रक्रिया अघि बढाउने निणर्य गरेको समितिका अध्यक्ष तथा स्वास्थ्यमन्त्री थापाका सल्लाहकार प्रताप पौडेलले जानकारी दिए ।
यस्तै केन्द्रलाई मुटुसम्बन्धी अध्ययनअनुसन्धान र जनशक्ति उत्पादनका लागि निकट भविष्यमै प्रतिष्ठानको स्वरूप दिने निर्णय भएको र त्यसका लागि आवश्यक कार्ययोजना बनाउन स्वास्थ्यमन्त्री थापाले निर्देशन दिएका छन् ।
केन्द्रलाई प्रतिष्ठानको स्वरुप दिने निर्णय भएको छ ।
लामो समय चलेको छलफलपछि समितिले केन्द्रको सेवा प्रभावकारी भए पनि रिफर भई मुलुकभरबाट आउने बिरामीको चाप थेग्न समस्या भएको र बिरामी स्वयंलाई पनि उपचारका लागि लामो यात्रा गर्नुपर्नेलगायत अनेकौं समस्या झेल्नुपरेको उल्लेख गर्दै त्यस्तो निर्णय गरेको हो ।
‘हामीले प्रभावकारी सेवा दिँदादिँदै पनि बिरामीको चापले कतिपय अवस्थामा उनीहरूले सोचेजस्तो सेवा पाउन सकेका छैनन्', अस्पताल स्रोतले भन्यो, ‘वा विकेन्द्रीकरण गर्न सकियो भने त्यो समस्या आफैं समाधान हुने थियो ।
त्यसका लागि जनशक्ति र पूर्वाधार विकास गर्नुपर्छ । र यो कन्द्रलाई प्रतिष्ठान बनाइयो भने त्यहाँबाट उत्पादन हुने जनशक्तिलाई सन्तुलित रूपमा वितरण गर्न सकिन्छ ।' उनले सेवा विस्तार र प्रतिष्ठानका विषयमा आफूहरूले लामो समय आवाज उठाए पनि अहिलेका स्वास्थ्यमन्त्रीले साथ दिँदा निर्णय भएको बताए ।
बैठकमा केन्द्रका सञ्चालका समितिका अध्यक्ष स्वास्थ्यमन्त्री गगन थापासँग उपत्यकाबाहिर विशेषज्ञद्वारा मुटुरोग उपचार सेवा दिन केन्द्रलाई प्रतिष्ठान बनाउनुपर्ने माग गरेका थिए । प्रतिष्ठानबाट जनशक्ति उत्पादन गरी वितरण गरेपछि मात्रै उपत्यकाबाहिर मुटुरोगको विशेषज्ञ सेवा सहज रूपमा दिन सकिने उनीहरूको भनाइ थियो ।
बैठकमा स्वास्थ्यमन्त्री थापाले थोरै पैसा खल्तीमा बोकेर दुर्गमबाट काठमाडौंसम्म उपचार गर्न आउन बिरामीले ठूलो कष्ट व्यहोर्नुपरेको र उपचारभन्दा पनि उपचारका लागि धाउँदा धेरै पैसा खर्च गर्नुपर्ने भएकाले उनीहरूका सहजताका लागि काम गर्नुपर्ने बताएका थिए ।
साथै उनले सरकारी र गैरसरकारी दुवै स्तरमा स्रोत जुटाएर उक्त केन्द्रमा आउने कुनै पनि मुटुरोगका बिरामीले पैसाको अभावमा स्वास्थ्य सेवा पाउनबाट वञ्चित हुने वातावरणको अन्त्य गर्न पनि निर्देशन दिएका छन् । बैठकमा मुटुसँग सम्बन्धित बिरामीलाई दिने गरिएको औषधिको मूल्य घटाउने विषयमा छलफल भए पनि कुनै निर्णय गरिएको छैन ।
गंगालाल मुलुकको एकमात्र मुटुसम्बन्धी सम्पूर्ण उपचार सेवा दिने सरकारी अस्पताल हो ।
प्रतिक्रिया दिनुहोस !
