हिमालय एअरलाइन्सको कोलोम्बो र श्रीलंका उडान
काठमाडौः नेपाल र चीनको संयुक्त लगानीमा सञ्चालित हिमालय एअरलाइन्स्ले आफ्नो बहुप्रतीक्षित दोस्रो गन्तव्य श्रीलंकाको राजधानी कोलम्बोमा काठमाडौंदेखि कोलम्बो हुँदै फेरि काठमाडौं सीधा उडान गर्ने भएको छ ।
कम्पनीका अनुसार असोज १५ देखि नियमित उडान सेवा सुरु हुनेछ । आठ बिजनेस क्लास तथा एक सय ५० इकोनोमिस क्लाससहित जम्मा एक सय ५८ सीट क्षमता बोकेको एअरलाइन्सको एअर बस ३२०-२१४ ले नयाँ रुटको उडान गर्ने कम्पनीले जनाएको छ ।
उडान तालिका अनुसार एअरलाइन्सले साताको तीन दिन उडान गर्नेछ । कोलम्बो उडानबारे टिप्पणी गर्दै कम्पनीका उपाध्यक्ष विजय श्रेष्ठले अघिल्लो दुई गैरनिर्धारित कोलम्बो उडानबाट प्राप्त उत्साहजनक प्रतिक्रियाबाट यो रुट हामीले सम्भावना बोकेको रुट पाएकाले सुरु गरेको जनाए ।
उनले दुई देशबीच वर्षौदेखिको यात्रुको चापलाई अध्ययन गरेर हामीले यो गन्तव्य सुरु गर्ने निर्णय गरेका बताएका छन् ।
एअरलाइन्सले क्लासिक ट्राभल्सलाई कोलम्बोका लागि जेनरल सेल्स एजेन्ट नियुक्त गरेको छ । कम्पनीले श्रीलंकामा एअरलाइन्सको बजार विकास, सिट आरक्षण, टिकेटिङलगायत सेवा प्रदान गर्ने कम्पनीले जनाएको छ । एअरलाइन्सले कोलम्बोका लागि एकोहोरो र दोहोरो भाडादर क्रमशः २९ हजार एक सय ९१ र ५० हजार ४१ देखि सुरु गरेको जनाएको छ ।