विरहीको ‘आगो निभेको छैन’
काठमाडौः वरिष्ठ पत्रकार हरिहर विरहीको पुस्तक ‘आगो निभेको छैन’ बिहीबार लोकार्पण भएको छ । संस्मणत्मक पुस्तकमा वर्णन गरिएका दुई सहिद वोधदत्त उपाध्याय र केशव कोइरालाका श्रीमतीहरू विद्या घिमिरे र गुणकुमारी कोइरालाले कृतिको संयुक्त रूपमा विमोचन गरेका थिए ।
उपप्रधानमन्त्री विमलेन्द्र निधिले पुस्तक २०/२२ सालयताको प्रजातान्त्रिक आन्दोलनको कथा भएको बताए । उनले भने, ‘प्रजातान्त्रिक आन्दोलनको कथालार्ई नयाँ पुस्तामा हस्तान्तरण गर्न पुस्तक सहयोगी भएको छ ।’
पत्रकार/लेखक विजयकुमारले गाह्रो पत्रकारिताको बाटो हिँडेर आएका विरहीले रूखासुखा लाग्ने अन्तर्वार्ता विधामा परिवर्तन ल्याएको बताए । चिन्तक तथा नेपाली कांग्रेसका नेता प्रदीप गिरीले पुस्तकको टिप्पणी गर्दै भने, ‘ऐना हेर्नुजस्तै गाह्रो काम संस्मरण लेख्नु हो । त्यो गाह्रो काम विरहीले राम्रोसँग गर्नुभएको छ ।’ उनले आफूहरू धेरैले बीपीलाई सर्वगुणसम्पन्न नेताका रूपमा हेरेकाले धेरैको उहाँसँग मोहभंग भएको बताए ।
नेपाली कांग्रेसका शीर्ष नेता रामचन्द्र पौडेलले पुस्तकमा वर्णन गरिएको नख्खु जेलको प्रसंग उल्लेख गर्दै आफू जेलमा छँदाका अनुभव सुनाए । कांग्रेसका अर्का शीर्ष नेता कृष्णप्रसाद सिटौलाले अहिले राजनीतिक नेतृत्व लिनेका लागि पुस्तक पाठ हुने बताए ।
लेखक विरहीले पुस्तकमा आफूले आफ्नो तस्बिर उतार्ने कोसिस गरेको बताए । फाइनप्रिन्टले प्रकाशन गरेको पुस्तकको मूल्य ४९८ रुपैयाँ कामय गरिएको छ ।
प्रतिक्रिया दिनुहोस !
