१५ वर्षपछि ‘राजेन्द्र लक्ष्मी'
काठमाडौः नेपालको एकीकरण गर्ने साहसिक महारानी राजेन्द्रलक्ष्मी शाह इतिहासमा शक्तिशाली नारी थिइन् । देशलाई एकीकरण गर्ने अभियान गरी बाईसे र चौबीसे राज्यलगायत लमजुङ, तनहुँ राज्यलाई आफ्नो राज्यमा गाभेकी थिइन् । तिनै नेपाल एकीकरण अभियानकी नायक राजेन्द्रलक्ष्मीको जीवनकथामा आधारित नाटक मञ्चन सुरु भएको छ ।
नेपालमा लामो समयसम्म शासन गर्ने रानी राजेन्द्रलक्ष्मी नै हुन् । यिनी राजा प्रताप सिंहकी पत्नी हुन् भने पृथ्वीनारायण शाहकी बुहारी । ससुरा पृथ्वीनारायण शाहले थालेको एकीकरणको अभियानलाई सफल पार्न आफैं राजेन्द्र लक्ष्मी युद्धमा होमिएको इतिहास छ ।
रामकेशर बस्नेत, सेनानी अमरसिंह थापा, अभिमानसिंह बस्नेतलगायत वीर सेनाको बलमा यिनले चौबीसे राज्यलाई एकीकरण गरी गोर्खालीलाई शक्तिशाली राज्यको परिचय दिलाएकी थिइन् ।
वि.स. १८४० को हाराहारीमा भएको ऐतिहासिक घटनालाई ख्वापा नाटकघरमा नाटकको माध्यमबाट प्रस्तुत गर्ने प्रयास गरिएको छ । वरिष्ठ नाट्यकर्मी प्रचण्ड मल्लद्वारा लिखित नाटक ‘राजेन्द्रलक्ष्मी' मञ्चन भइरहेको हो । मल्लले यो नाटक २०५८ सालमा मञ्चन गराएका थिए ।
हाल संसद् भवन रहेको ठाउँमा उक्त नाटक देखाइएको थियो । नाटक तत्कालीन राजा वीरेन्द्रसहित राजपरिवारले हेरेका थिए । सोही नाटक ख्वापा नाटकघरमा असोज ८ गतेबाट सुरु भएको हो । प्रदीप खड्गी पासा र भोला अधिकारीद्वारा निर्देशन गरिएको नाटक असोज १५ गतेसम्म मञ्चन हुनेछ । नाटकले मञ्चनको सुरुवातबाटै दर्शकको साथ पाएको छ ।
राजेन्द्रलक्ष्मीको भूमिकामा उमा तामाङ छन् । उनको अभिनय निकै सशक्त छ । उमाले जीवन्त अभिनय गरेकी छन् । नाटकमा उमा तामाङ, रामकृष्ण श्रेष्ठ, अर्जुन बोहोरा, प्रदीप खड्गी (पासा), दीपुमाया तामाङ, सम्झना मगर, रवि कार्की, सुरेन्द्र कटुवाल, रिभा तामाङ, रोशन डोटेल, सम्पूर्ण भण्डारी, सुमित्रा मगर, प्रदीप नेपाल र भोला अधिकारीको अभिनय रहेको छ ।