विश्वकपको छनोट चरणबाट बाहिरियो नेपाल

काठमाडौं: आईसीसी महिला विश्व कप क्रिकेटका लागि खेलिएको एसियाली क्षेत्रको छनोट शृंखलामा शुक्रबार नेपाली टोली थाइल्यान्डसँग प्रतिस्पर्धात्मक खेलमा एक विकेटले पराजित भएको छ ।

हारसँगै नेपाल विश्व कपको छनोट चरणबाटै बाहिरिएको छ भने थाइल्यान्डले एसियाली क्षेत्रको छनोट चरण पार गरेको छ । पाँच खेल खेलेको नेपाल चार अंकसहित तालिकाको चौथो तथा अन्तिम स्थानमा छ । तालिकाको पहिलो स्थानमा आसीन थाइल्यान्डले पाँच खेलबाट आठ अंक जोडेको छ भने दोस्रो स्थानमा रहेको चीनले पाँच खेलबाट चार अंक बटुलेको छ । तालिकाको तेस्रो स्थानमा आसीन हङकङले पनि पाँच खेलबाट चार अंक जोडेको छ ।

हङकङ क्रिकेट क्लबमा खेलिएको आफ्नो पाँचौं खेलमा टस जिती पहिले ब्याटिङ्को निर्णय लिएको नेपालले निर्धारित २० ओभरमा चार विकेट गुमाएर एक सय आठ रन बनाएको थियो । जवाफी ब्याटिङमा ओर्लिएको थाइल्यान्डले १८.४ ओभरमा नौ विकेट गुमाएर विजयलक्ष्य पूरा ग¥यो । पहिले ब्याटिङ गरेको नेपालका लागि नेरी थापाले अविजित ३२ रनको योगदान गरिन् । उनले केवल २५ बलको सामना गरी एक छक्का र तीन चौका प्रहार गरिन् ।

टोलीको कूल स्कोर केवल पाँच रन हुँदा पहिलो विकेट गुमाएको नेपालका लागि इन्दु बर्माले पनि २६ रनको योगदान गरिन् । उनले ३६ बलको सामना गरी तीन चौका हिर्काइन् । रोशनी बोहरा केवल दुई रनको व्यक्तिगत स्कोरमा पेभेलियन फर्किएपछि क्रिज समाल्न आएकी निर्मला शाहीले टोलीको खातामा २० रन थपिन् । उनले २० बलको सामना गरी दुई चौका प्रहार गरिन् ।

ओपनरसमेत रहेकी विकेटकिपर ज्योति पाण्डेले १३ रन जोडिन् । उनले २६ बलको सामना गरी एक चौका हिर्काइन् । कप्तान रुविना क्षेत्री भने १० रनमा अविजित रहिन् । उनले ६ बलको सामना गरी एक छक्का प्रहार गरिन् । थाइल्यान्डकी बलर चानिदा सुथिरुआङले दुई र सुलिपोर्न लाओमीले एक विकेट लिए ।

जवाफी ब्याटिङमा ओर्लिएको थाइल्यान्डका लागि ओपनरद्वय नाट्टाकान चानतम र सिरिनत्रा सेङ्साकाओरतले २९ रनको साझेदारी गरे । चानतमले केवल ११ बलमा एक छक्का र तीन चौकाको मद्दतले २३ रन जोडिन् भने सेङ्साकाओरत १६ बलमा दुई चौकाको मद्दतले १८ रन थपिन् ।

थाइल्यान्डका लागि सर्वाधिक रन भने चानिदा सुथिरुआङले अविजित २७ रनको योगदान गरिन् । उनले २५ बलको सामना गरी एक छक्का र दुई चौका प्रहार गरिन् । सोही योगदानका कारण उनी प्लेयर अफ दि म्याच पनि घोषित भइन् । वङ्पाका लिङप्रासर्तले ११ र सुलिपोर्न लाओमीले नौ रन बनाइन् ।

थाइल्यान्डले एक सय आठ रनको कूल स्कोरमा नवौं विकेट गुमाएरपछि खेल रोमाञ्चक बनेको थियो । तर क्रिज समाल्न आएकी राट्टाना साङ्सोमाले आफ्नो पहिलो बलमै एक रन बनाउँदै थाइल्यान्डलाई विजयलक्ष्य पार गराइन् ।

नेपाली बलर करुणा भण्डारीले चार विकेट लिइन् । उनले चार ओभर बलिङ गर्दै केवल १५ रन खर्चिइन् । रुविना क्षेत्री र सीता रानामगरले पनि दुईदुई विकेट हात पारे । अर्को एक विकेट निर्मला शाहीले लिइन् । नेपालले आफ्नो छैटौं तथा अन्तिम खेल शनिबार चीनसँग खेल्ने छ । सोही दिन आफ्नो अन्तिम खेलमा थाइल्यान्डले हङकङको सामना गर्नेछ ।

एसियाली क्षेत्रको छनोट चरणमा सहभागी चारमध्ये एक टोली विश्वस्तरीय छनोट प्रतियोगिताका लागि चयन हुने प्रावधान रहेको छ । विश्व स्तरीय छनोट प्रतियोगितामा १० टोली सहभागी हुनेछन् र अंक तालिकाको माथिल्लो स्थानमा आउने त्यसबाट चार टोली सन् २०१७ मा इङ्ल्यान्डमा आयोजना हुने महिला विश्व कपका लागि छनोट हुनेछन् ।

शुक्रबार नै भएको खेलमा चीनले हङकङलाई १८ रनले पराजित ग¥यो । टस जिती पहिले ब्याटिङ रोजेको चीनले १९ ओभरमा अलआउट हुनुअघि एक सय १४ रन बनाएको थियो । जवाफी ब्याटिङमा ओर्लिएको हङकङले निर्धारित ओभरमा ६ विकेट गुमाएर ९६ रनमात्र बनाउन सक्यो । पहिले ब्याटिङ गरेको चीनका लागि फेङफेङ सङले ३६ र कप्तान ह्युङ झुले ३१ रन बनाए । काइयुन झुले पनि १६ रन थपिन् ।

चीनका अन्य खेलाडीले भने दोहोरो संख्यामा रन बटुल्न सकेनन् । जवाफी ब्याटिङमा ओर्लिएको हङकङका लागि कप्तान मारिको हिलले सर्वाधिक ३८ रनको योगदान गरिन् । किनु गिलले १३ र नेचुरल इपले ११ रन थपिन् । अन्य खेलाडीले भने दोहोरो संख्यामा रन बटुल्न सकेनन् । चीनका बलर उ हुवाँले तीन विकेट लिइन् । उनी प्लेयर अफ दी म्याच घोषित भइन् ।