मुकेशलाई पहिलो सहभागितामै रजत
काठमाडौंः इन्डोनेसियाको राजधानी जकार्तामा सम्पन्न छैटौं तफिसा वल्र्ड स्पोटस फर अल गेम्सअन्तर्गत भएको दोस्रो जोरखाने फेस्टिभल च्याम्पियनसिपको पुरुष कुस्ती ८०-९० केजी तौलसमूहमा नेपालका मुकेशकुमार ठाकुरले रजत पदक जितेका छन् ।
अक्टोबर ६ देखि १२ तारिखसम्म भएको प्रतियोगितामा मुकेशको स्पर्धामा १७ जना खेलाडी सहभागी थिए । सहभागी खेलाडीलाई दुई समूहमा विभाजन गरी नकआउटका आधारमा खेल खेलाइएको थियो । मुकेशले पाकिस्तान र इराकका खेलाडीलाई पराजित गरे ।
फाइनलमा मुकेश इरानका खेलाडीसँग पराजित भएपछि स्वर्ण पदकबाट वञ्चित भएका थिए । उक्त स्पर्धामा भारत र अजरबैजानका खेलाडी संयुक्त रूपमा तेस्रो भए । पर्सा निवासी २४ वर्षीय मुकेशको यो पहिलो अन्तर्राष्ट्रिय प्रतियोगिता हो । प्रतियोगितामा नेपालबाट मुकेशसहित सातजना खेलाडीले प्रतिस्पर्धा गरेका थिए । बाँकी खेलाडी भने पदकविहीन बने ।
कुस्तीमा १२ औं दक्षिण एसियाली खेलकुद (साग) र १७ औं इन्चोन एसियाडमा सहभागी सुमिरकुमार साहले पुरुष ९० केजीभन्दा माथि र कुन्दन साहले ५०-६० केजी तौलसमूहमा प्रतिस्पर्धा गरेका थिए । कुन्दनले जोरखानेमा पनि भाग लिएका थिए । कुन्दनसहित जोरखानेमा सहभागी अन्य खेलाडी अनुजसिंह श्रेष्ठ, मिलन रानामगर, कमल श्रेष्ठ र अनन्त अर्यालले विभिन्न व्यक्तिगत र टिम स्पर्धामा सहभागिता जनाएका थिए ।
जोरखानेमा समग्रमा नेपाल चौथो स्थानमा रह्यो । नेपालले ७३ अंक जोड्यो । इरान एक सय ५१ अंकसहित पहिलो र अजरबैजान एक सय ४० अंकसहित दोस्रो भए । ९९ अंकसहित इराक र ८० अंकसहित अफगानिस्तान संयुक्त रूपमा तेस्रो भए । जोरखानेमा विभिन्न २६ राष्ट्रका एक सय ७८ जना खेलाडीले सहभागिता जनाएका थिए ।
प्रतिक्रिया दिनुहोस !
