जोकोभिच सेमिफाइनलमा
सांघाईः सर्बियाका नोभाक जोकोभिच सांघाई मास्टर्स टेनिसको पुरुष एकलतर्फको सेमिफाइनलमा पुगेका छन् । उनले शुक्रबार भएको क्वार्टरफाइनल खेलमा तुलनात्मक रूपमा कमजोर जर्मन प्रतिद्वन्द्वी मिसचा जाभरेभलाई पराजित गर्दै सेमिफाइनलमा स्थान पक्का गरेका हुन् । जोकोभिच प्रतियोगिताका साबिक विजेता पनि हुन् । जोकोभिचले जाभरेभलाई हराउन भने ठूलै कसरत गर्नु पर्यो ।
पहिलो सेटको खेलमा ३-६ अंकले पछि परेका जाकोभिचले दोस्रो सेटको नतिजालाई ७-६ (४) ले आफ्नो पक्षमा पारेका थिए । त्यसपछि तेस्रो सेटको नतिजालाई ६-३ ले आफ्नो पक्षमा पार्दै जोकोभिच सेमिफाइनलमा पुगेका हुन् । छनोट चरण पार गरेर प्रतियोगितामा सहभागी भएका जाभरेभ एक सय १० औं वरीयतामा आसीन खेलाडी हुन् ।
‘इमानदारीपूर्वक भन्नु पर्दा क्वार्टरफाइनलमा जाभरेभलाई हराउन मैले ठूलै परि श्रम गर्नुप¥यो, उनी मेरा लागि सोचेभन्दा कठिन प्रतिद्वन्द्वी सावित भए', खेलपछि पहिलो वरीयताका जोकोभिचले भने । जोकोभिचले हालसम्म तीन पटक सांघाई मोस्टर्सको उपाधि चुमेका छन् ।
उनले प्रतियोगिताको सेमिफाइनलमा स्पेनिस खेलाडी रोबेर्टो बाउटिस्टासँग प्रतिस्पर्धा गर्नेछन् । बाउटिस्टा भने फ्रान्सका जो विलफ्राइड सोंगालाई ६-३, ६-४ को सोझो सेटमा हराउँदै सेमिफाइनलमा पुगेका हुन् । सोंगा साबिक उपविजेता हुन् ।
यसैबीच, अस्ट्रेलियन खेलाडी डारिया ग्याब्रिलोभा हङकङ ओपन टेनिस प्रतियोगिताको सेमिफाइनलमा पुगेकी छन् । उनी शुक्रबार भएको क्वार्टरफाइनल खेलमा पहिलो वरीयताकी जर्मन खेलाडी एन्जेलिक केर्बरलाई ६-३, ६-१ को सोझो सेटमा पराजित गर्दै प्रतियोगिताको सेमिफाइनलमा पुगेकी हुन् ।
गत महिना ग्रान्डस्लाम प्रतियोगिता यूएस ओपनको उपाधि जितेयता खेलिएका विभिन्न प्रतियोगितामा केर्बर तेस्रो पटक सेमिफाइनभन्दा अगाडि नै पराजित भएकी हुन् । प्रतियोगितामा आठौं वरीयता पाएकी ग्याब्रिलोभाले केर्बरलाई हराएको यो पहिलो पटक हो ।
प्रतिक्रिया दिनुहोस !
