चिनियाँलाई गाउँबाट रुद्राक्ष खरिद गर्न रोक

खाँदबारी: चिनियाँ व्यापारिलाई गाउँमा पुगेर रुद्राक्ष खरिद गर्न रोक लगाइएको छ । चिनियाँले रुद्राक्ष खरिदको बहानामा संखुवासभका गाउँगाउँमा पुगेर विभिन्न गतिविधि गरेको भन्दै रुद्राक्ष व्यवसायी संघले गाउँमै पुगेर रुद्राक्ष खरिदबिक्री गर्न रोक लगाएको हो ।

व्यवसायी संघको शनिबार बसेको बैठकले चिनियाँले नेपालीलाई भ्रममा पार्ने र रुद्राक्ष खरिदका नाममा विभिन्न क्रियाकलाप गर्ने गरेको निष्कर्षसहित गाउँ नपस्न आग्रह गरी प्रशासन कार्यालयलाई समेत जानकारी गराउने निर्णय गरेको छ । रुद्राक्ष खरिद गर्न आएका अधिकांश चिनियाँ पर्यटक भिसामा आउने गरेको र गाउँगाउँसम्म पुगेर रुद्राक्ष खरिद गरेको व्यवसायी संघको भनाइ छ । उनीहरूले जिल्ला विकास समितिबाट निकासी अनुमतिपत्र पनि लिएका छैनन् । उनीहरूमा व्यापारिक गतिविधि नपाइएको संघको आरोप छ ।

रुद्राक्ष व्यवसायी संघमा सहकार्य नगरी आफूखुसी काम गर्ने गरेको व्यवसायी संघका अध्यक्ष बिपिन राईले बताए । पर्यटकले करोडौंको रुद्राक्ष खरिद कसरी गर्न सक्छ र यो पैसा कसरी ल्याउँछ ? भन्ने प्रश्न पनि उठ्न थालेको छ । व्यापारिक भिसा लिएर आएका चिनियाँले पनि तुम्लिङटार र खाँदबारी बजारमा मात्र खरिद गर्र्नुपर्ने संघको भनाइ छ । उनीहरूलाई गाउँगाउँमा पुगेर विभिन्न गतिविधि गर्न छुट नभएको भन्दै प्रशासनको ध्यानकर्षण गराइएको छ ।

हाल संखुवासभा र भोजपुरका गाउँगाउँमा करिब दुई सय चिनियाँ रहेको अनुमान छ । कोही रुद्राक्ष खरिद गर्छन् भने केही मठमन्दिरलगायत महत्त्वपूर्ण स्थलको तस्बिर कैद गर्नमै व्यस्त हुन्छन् । चिनियाँ थारैले मात्र रुद्राक्ष खरिद गर्ने गरेको र अधिकांश गाउँगाउँमा घुमन्ते भएर हिड्ने गरेको स्थानीयको आरोप छ । राज्यका निकायले चिनियाँको भिसाको प्रकृति र गतिविधिमा कुनै चासो नदेखाएको भन्दै रुद्राक्ष व्यवासायी संघले विज्ञप्तिमार्फत आपक्ति जनाएको छ ।

गाउँगाउँ पुगेका रुद्राक्ष खरिद र अन्य गतिविधि गर्दा जिम्मेवार निकायले चासो दिनुपर्ने आग्रह गरिएको छ । स्थानीयका अनुसार विगत दुई वर्ष यतादेखि चिनियाँ प्रवेश गर्न थालेको हुन् । पर्यटकले कति दिन घुम्ने कहाँ घुम्ने र कति खर्च गर्ने भन्ने राज्यको नीतिमा छ । यसलाई राज्यले प्रयोगमा ल्याउनु पर्ने व्यवसायीको सुझाव छ । पछिल्लो समय किमाथांका नाका चर्चामा आएसँगै संखुवासभामा चिनियाँको आगामन बढेको छ ।