पर्यटकको नयाँ गन्तब्य बन्दै पुम्दी

पोखराः तीन दिनको पदयात्रा गरिसकेका सुजन कुप दम्पतीले अन्तिम दिन हाइकिङमा जाने निधो गरे । हाइकिङकाक्रममै शनिबार भेटिएकी कुपले भनिन्, ‘सबैभन्दा आनन्दचाहिँ आज भयो ।’ शनिबार उनी पतिसहित पुम्दीकोटमा भेटिएकी थिइन् । हत्तपत्त पर्यटक नपुग्ने यो डाँडामा आएजति धेरैले यस्तै प्रतिक्रिया दिने गरेको स्थानीय ध्रुव बरालको अनुभव छ ।

पर्यटकले रुचाएको यही डाँडालाई पोखरामा पर्यटकको नयाँ गन्तब्य बनाउन स्थानीयले अभियान नै थालेका छन् । अभियानकै क्रममा पुम्दीकोटमा भ्युटावर बनिसकेको छ । अबचाहिँ स्थानीयको लक्ष्य १०८ फिट अग्लो शिवमूर्ति निर्माण गर्ने हो ।

शनिबार पत्रकार सम्मेलन गरेर मूर्ति निर्माणको काम सुरु भएको जानकारी दिइयो । टावर बनेपछि पोखरा बजारबाट टावर छर्लंग देखिन थालेपछि पर्यटकको चासो बढेको स्थानीय बताउँछन् । स्थानीयमा टावरभन्दा अग्लो मूर्ति बनाउने जाँगर चलेको हो । ‘टावर निर्माण र पार्क व्यवस्थित गर्दै सवा करोड खर्च भइसक्यो’, स्थानीय अगुवा रामजी बरालले भने, ‘अब २१ करोड रुपैयाँको योजना छ ।’

समिति अध्यक्ष चन्द्रकान्त बरालका अनुसार ध्यानकेन्द्र, बगैंचा, शिवमूर्तिसहितको गुरुयोजना तयार भइसकेको छ । त्यसको आर्किटेक्ट डिजाइन पनि तयार पारिसकेको जानकारी उनले दिए । ५ वर्षभित्र गुरुयोजना कार्यान्वयनको लक्ष्य राखिएको छ । १७ रोपनी जमीनमा पर्यटकीय पूर्वाधार विकास गर्न लागिएको हो ।

फेवातालबाट दक्षिणमा उभिएको पुम्दीकोटबाट तालसँगै हरिया डाँडा र अन्नपूर्ण, धौलागिरि र मनास्लु हिम श्रृंखलालगायतका धेरैजसो हिमालहरू देखिन्छन् । पोखरा बजारपनि छर्लंग देखिन्छ । पुम्दीकै अनदु डाँडामा विश्व शान्ति स्तूप छ । निप्पोजन मियोजी अर्थात अखिल जापान भिक्षु संघद्वारा निर्मित स्तूप पोखरा आउने पर्यटकको गन्तव्य भएको छ ।

यो स्तूपभन्दा ४ सय मिटर अग्लो डाँडा पुम्दीकोटमा धार्मिक पर्यटकसमेत लोभ्याउने गरी शिवमूर्ति स्थापना गर्न लागिएको हो । मूर्ति र पार्कका लागि मात्रै ५ करोड २५ लाख रुपैयाँ खर्च लाग्ने अनुमान छ ।

स्थानीयको योजनाकै लागि सरकारले यो वर्ष नागरिक उडड्यन तथा पर्यटन मन्त्रालयमार्फत २० लाख रुपैयाँ विनियोजन गरिसकेको छ । मंसिरको पहिलो साता योजना कार्यान्वयन थालिने प्रकाश बरालले जानकारी दिए । ‘मूर्ति र सहिद स्मृति पार्क भने २ वर्षमै पूरा हुनेछन्’, उनले भने । पुम्दीकोटलाई पोखराको पर्यटकीय नक्साभित्र समेट्ने प्रयास थाल्ने आश्वासन क्षेत्रीय प्रशासक खगराज बरालले दिएका छन् ।

पुम्दीकोट पश्चिमको गुरुङ गाउँ कालाबाङमा घरबास पर्यटन सुरु भइसकेको छ । पुम्दीमै पर्ने फेवाताल किनारको रानीवनमा जैविक विविधता पार्क निर्माण जारी छ । यी पूर्वाधारले पनि पुम्दीकोटलाई पर्यटकीय स्थल बनाउन सहयोग पुग्ने विश्वास स्थानीयले गरेका छन् । फेवा किनारबाट पुम्दीको अनदु डाँडानजिकै केबलकार जोड्ने प्रयास पनि भएको छ ।

१५ सय मिटर उचाइमा रहेको पुम्दीकोटबाट निहुरिएर हेर्दा फेवातालमाथिको आकाशमा चराहरु कावा खाइरहेको देखिन्छ । रंगीबिरंगी प्याराग्लाइडिङको उडान पनि यहाँबाट देखिने लोभलाग्दो दृश्य हो । सूर्योदय र सूर्यास्तका लागि पनि पुम्दीकोट उपयुक्त छ ।

‘पूर्णिमाको दिन फेवातालमा माछापुच्छेको प्रतिबिम्व बिछट्टै रमाइलो देखिन्छ’, अनदु डाँडामा एलाइट क्याफे सञ्चालन गरिरहेका राजु क्षेत्री भन्छन्, ‘वास्तवमा पोखरा, फेवाताल र हिमाली श्रृंखला एकैनजरमा हेर्न पाइने यो भन्दा उत्तम शिखर अर्काे कुनै छैन ।’ मोटर बाटोको पहुँचसमेत पुगिसकेको हुँदा अहिले पनि पुम्दीकोटमा पर्यटकलाई आउनजान सजिलो रहेको उनले बताए ।