कृषि र पशुपालनमा नौ करोड

बेनीः चालु आर्थिक वर्षका लागि म्याग्दी जिल्लामा कृषि तथा पशुपालन क्षेत्रलाई नौं करोड रुपैयाँ बजेट उपलब्ध भएको छ । पशु सेवा कार्यालयले चालु तथा पुँजीगततर्फ करिब ६ करोड र जिल्ला कृषि विकास कार्यालयले ३ करोड रुपैयाँ बार्षिक बजेट स्वीकृत भएको जानकारी गराएको हो ।

पशु सेवा कार्यालयका प्रमुख डा. दयाराम चापागाइले अन्डा र दुधमा आत्मनिर्भर बनाउन बजेट प्राप्त भएको जानकारी दिए । ‘मन्त्रालयले लिएको लक्ष्य अनुसार म्याग्दीलाई यो वर्ष अन्डामा आत्मनिर्भर बनाइने छ भने अर्को वर्ष दुधमा, सोहि अनुसार जिल्लालाई सघाउने गरी बजेट निकासा भएको छ’, उनले भने ।

अन्डामा आत्मनिर्भर बनाउन १० लाख, दुधको लागि ११ लाख, कालीगण्डकी क्षेत्रका भेडापालक किसानलाई ७० लाख र राष्ट्रिय पुनःनिर्माण कोषलाई ६१ लाख रुपैयाँ बजेट प्राप्त भएको छ ।

त्यस्तै, शिख गाविसमा चौरीगाई विकास लागि ६ लाख, कुखुरा बँगुर प्रवद्र्धन गर्न १९ लाख, नश्ल सुधार तथा पशु आहारको लागि १३ लाख रुपैयाँको विनीयोजन गरिएको छ ।

स्थानीय जातका लिमे पारकोटे संरक्षणदेखि युवा, महिला, एकल महिला तथा दुर्गम क्षेत्रलाई लक्षित गरी कार्यक्रम सञ्चालन गरिने पशु सेवा कार्यालयले जनाएको छ । ‘अहिले उत्तरी म्याग्दीको कालीगण्डकी क्षेत्रमा भेडापालनको राम्रो आकर्षण छ, सोही अनुसार बजेट पनि आएको छ’ उनले भने, ‘म्याग्दीको समृद्धि भेडा तथा बाख्रापालनबाट सम्भव छ ।’

जिल्ला कृषि विकास कार्यालयका वरिष्ठ कृषि विकास अधिकृत श्याम प्रसाद रिजालले चालु आवमा आलुमा आत्मनिर्भर बनाउने लक्ष्य राखिएको बताए । उनका अनुसार, खाद्यान्न बालीको बिउमा आत्मनिर्भर बनाउन ६ लाख, सिँचाईका लागि ८ लाख, आलु उत्पादन आयोजनालाई २० लाख, व्यावसायिक तरकारी, तरकारीका बीउ र प्राङगारिक तरिकाले उत्पादन गर्न साढे २२ लाख, व्यावसायिक सुन्तला जातका फलफूल विकास गर्न ६२ लाख, अदुवा, बेसार बिस्तारलाई १० लाख रुपैयाँ उपलब्ध भएको छ ।

कृषि प्रसार प्रविधि तर्फ ११ लाख, व्यावसायिक मौरीपालन र च्याऊ खेतीका लागि ११ लाख, राष्ट्रिय पुनर्निर्माण कोषलाई ३२ लाख ९० हजार र केन्द्रीय स्तरबाट विभिन्न किसिका कार्यक्रमलाई १ करोड २७ लाख रुपैयाँ बजेट प्राप्त भएको कृषि विकास कार्यालयले जनाएको छ । कार्यक्रममा सांसद नवराज शर्माले जिल्लामा प्राप्त बजेटको सहि कार्यान्वयनमा जोड दिए । ‘आत्मनिर्भर बनाउन सकिने कृषिजन्य उत्पादनलाई बढी जोड दिंदै जानुपर्छ’, उनले भने ।