६० करोडमा होटेल

नेपालगन्जः नेपालगन्जमा स्तरीय तारे होटेल सञ्चालनमा आएको छ । बाँकेको गनापुरमा होटेल ह्वाइट हाउस रिजेन्सी सञ्चालनमा आएको हो । होटेलमा पहिलो चरणमा १६ करोड ६३ लाख लगानी भएको छ । विस्तारै होटेललाई पूर्णता दिँदै जाने प्रबन्ध निर्देशक भरतविलास पराजुलीले बताए ।

पहिलो चरणमा स्विमिङ् पुल, साइड क्याफे, हेल्थ क्लब, पाँच सय क्षमताको सेमिनार हल, गार्डेन तथा पार्कलगायत तयार भएका छन् । पार्टी प्यालेस, फिसिङ प्वाइन्ट, मिनी जु, ज्याकुजी, शैलुन, पार्लरजस्ता सुविधा दोस्रो चरणमा थपिने पराजुलीले बताए ।

होटलमा खुवाइने मुर्गिको अचारले आकर्षित गर्नेछ । यस्तै, च्याङ्ग्राको मासुका परिकार, चौरीको घिउका परिकार, स्याउको ब्रान्डी, केराको वाइन पनि होटेलमा उपलब्ध हुनेछन् ।

होटेलमा विभिन्न प्याकेजको व्यवस्था छ । एक सयको प्याकेजमा प्रवेशको मात्र सुविधा छ भने पाँच सयको प्याकेजमा स्विमिङ् स्लाइडिङ, हेल्थ क्लबसहित चिया, कफी, कोल्ड ड्रिङसको व्यवस्था छ । हजारको प्याकेजमा ब्रेकफास्ट, लन्च र डिनरको थप सुविधा छ ।

दिपावली लगत्तै होटेलले ९० कोठाको भवन निर्माण कार्य अगाडि बढाउने भएको छ । चारतारे होटेलको निर्माण सम्पन्न भइसक्दा लगानी ६० करोड पुग्ने अनुमान छ ।