ठूला फाइल पठाउन स्म्यास
आफ्नो साथी वा कसैलाई अनलाइनमा फाइल पठाउन परेमा सबभन्दा पहिलो रोजाइमा पर्छ 'ईमेल' । अधिकांश ईमेल सेवा प्रदायकले २५ देखि ३० एमबी साइजका फाइल अट्याचमेन्टको सुविधा दिएका छन् । यो लिमिटेसन कहिलेकाहीँ प्रयोगकर्ताका लागि समस्याको विषय बन्ने गरेको छ । जब हामीले पठाउनुपर्ने फाइलको साइज २५ देखि ३० एमबीभन्दा धेरै हुन्छ तब यो समस्या सिर्जना हुन्छ ।
मानौं, हामीले पठाउनुपर्ने फाइल ३० जीबीको छ, यो अवस्थामा गुगल ड्राइभ, वानड्राइभ अथवा ड्रपबक्सजस्ता फाइल स्टोरेज सेवा प्रदायकको प्रिमियम सुविधा आवश्यक पर्छ । फ्रीमा अनलिमिटेड स्टोरेज सेवा दिने खासै त्यस्ता कम्पनी छैनन् । भए पनि डाउनलोड स्पिड, अपलोड स्पिडलगायतका विषयमा कुनै न कुनै सेवामा लिमिट राखेकै हुन्छन् । यस्तो समय 'स्म्यास' नामक वेब एप्लिकेसनको प्रायोग गर्न सकिन्छ । यो एपको प्रयोग गरी जस्तोसुकै फाइल सजिलै सेयर गर्न सकिनेछ ।
यो एपको राम्रो पक्ष भनेको यसलाई प्रयोग गर्दा कुनै प्रकारको व्यक्तिगत जानकारी दिनु पर्दैन र साइटमा रजिस्टर नगरी आफूले चाहेजति साइजको फाइल अरूलाई पठाउन सकिन्छ ।
स्म्यास प्रयोग गर्ने तरिका
स्म्यास प्रयोग गरी फाइल पठाउन निकै सजिलो छ । त्यसका लागि सुरुमा फ्रमस्म्यास डट कममा गएर आफ्ना फाइल अपलोड गर्नुपर्छ । वेबसाइटमा 'ड्रयाग एन्ड ड्रप' सेवा पनि छ । पठाउनुपर्ने फाइललाई 'क्लिक अर ड्रप योर फाइल्स हियर' लेखेको ठाउँमा ड्र्याग गरेर अपलोड गर्नुपर्ने फाइल छान्न सकिन्छ । छेउमा रहेको फर्ममा आफ्नो नाम, ईमेल आईडी इन्ट्री गरेर सेन्ड बटन क्लिक गर्नासाथ छानिएका फाइल आफैं अपलोड हुन थाल्छ ।
यसरी माथि इन्ट्री गरिएको ईमेल आईडीमा, भर्खरै अपलोड भएका फाइलको, डाउनलोड गर्ने लिंक उपलब्ध हुन्छ । फाइल पूर्ण रूपले अपलोड भएपछि एउटा लिंक (यूआरएल) जेनेरेट हुन्छ । यो लिंक आफ्नो साथी वा जसलाई फाइल पठाउनुपर्ने हो, उसँग सेयर गर्न सकिन्छ । जोसँग यो लिंक हुन्छ, उसले सजिलैसँग ती फाइल डाउनलोड गर्न सक्छ ।
वेब एपको सबभन्दा राम्रो कुरा यो हो कि डाउनलोड गर्नुअघि फाइललाई हेर्न सकिन्छ । यसमा डाउनलोड नगरीकन सजिलै फोटो हेर्न, संगीत सुन्न, भिडियो हेर्न र कागजात पढ्न सकिन्छ । ध्यान दिनुपर्ने कुरा भनेको अपलोड गरिएको फाइल सात दिनसम्म 'स्म्यास'को सर्भरमा रहनेछ र सात दिनपछि स्वत ती फाइल डिलिट हुन्छन् ।