नेपालले स्याटलाइट अन्तरिक्षमा पठाउन गरेको आह्वानमा २० कम्पनीको आवेदन

काठमाडौं: सरकाले नेपालको आफ्नै स्याटलाइट अन्तरिक्षमा पठाउन आह्वान गरेको अन्तर्राष्ट्रिय बोलपत्रमा २० वटा कम्पनीको आवेदन परेको छ ।

सूचना तथा सञ्चार मन्त्रालयको निर्देशनमा नेपाल दूरसञ्चार प्राधिकरणले गत असोजमा नेपालको आफ्नै स्याटलाइट स्थापनाका लागि बोलपत्रमार्फत विश्वभरका इच्छुक कम्पनीलाई आशयपत्र पेस गर्न आह्वानको गरेको थियो ।

पुस ६ गतेसम्म आशयपत्र पेस गर्न आह्वान गरेकोमा २० वटा अन्तर्राष्ट्रिय कम्पनीले आशयपत्र पेश गरेको प्राधिकरणका प्रवक्ता मीनप्रसाद अर्यालले जानकारी दिए । अर्यालका अनुसार स्याटलाइट अन्तरिक्षमा पठाउन आह्वान गरिएकोमा विश्वका ठूलाठूला कम्पनीले आशयपत्र पेस गरेका छन् । त्यसमा अमेरिकाबाट इन्टेल स्याट, पौल स्याट, स्पेस पार्टनरसीप, स्पेस सिस्टम लोरल गरी चारवटा कम्पनीले आशयपत्र पेश गरेका छन् ।

इन्टेल स्याट विश्व स्याटालाइटमा सबैभन्दा प्रतिष्ठित संस्था रहेको प्राधिकरणले जनाएको छ । यस्तै चीनबाट तीनवटा कम्पनीले आशयपत्र पेस गरेका छन् । त्यसमा चाइना ग्रेटवाल, चाइना रकेटका साथै थप एक कम्पनी छन् । आशयपत्र पेस गर्नेमा भारतको सरकारी कम्पनी अन्तरिक्ष कर्पाेरेसन लिमिटेड पनि छ ।

छानिएको कम्पनीले नेपाल सरकारलाई ‘अर्बिटल स्लट’ मा स्याटलाइट राख्ने विषयमा सर्भे, डिजाइन, खरिद, स्थापना, सञ्चालन र मर्मतसम्भारलगायतका विषयमा सहयोग गर्नेछ ।

कोरियाबाट केटी स्याट, सिंगापुरबाट युटेल स्याट, जापानबाट जे स्याट, क्यानडाबाट टेली स्याट, इजरायलबाट सरकारी कम्पनी एरो स्पेसले आशयपत्र पेस गरेका छन् । त्यसका साथै फ्रान्स, साउदी अरब, मलेसिया, थाइल्यान्ड लगायतका देशबाट पनि आशयपत्र पेश भएको अर्यालले बाताएका छन् । उनका अनुसार आशयपत्र पेश गर्ने कम्पनी अपेक्षाभन्दा बाहिरका पनि छन् ।

यो रूपमा अन्तर्राष्ट्रिय कम्पनीको सहभागिताले नेपालको आफ्नै स्याटलाइट अन्तरिक्षमा पठाउन झन् प्रोत्साहन मिलेको अर्यालको भनाइ छ । योसँगै अब प्राधिकरणले सरकारसँगको सहकार्यमा आशयपत्र पेश गर्ने कम्पनीको बिजनेस मोडल, आर्थिक क्षमता तथा प्राविधिक ज्ञान र अनुभवका आधारमा २० वटा कम्पनीबाट उत्कृष्ट ६ कम्पनीको छनोट गर्नेछ । छानिएका उक्त ६ कम्पनीलाई फेरि बोलपत्रमार्फत आह्वान गरी त्यसबाट पनि एक कम्पनी छानिने प्राधिकरणले जनाएको छ ।

छानिएको कम्पनीले नेपाल सरकारलाई नेपालका लागि अन्तर्राष्ट्रिय रेडियो नियामक संस्था अन्तर्राष्ट्रिय दूरसञ्चार युनियन (आईटीयू)ले छुट्याइदिएको ‘अर्बिटल स्लट’ मा स्याटलाइट राख्ने विषयमा सर्भे, डिजाइन, खरिद, स्थापना, सञ्चालन र मर्मतसम्भारलगायतका विषयमा सहयोग गर्नेछ ।

आईटीयूले नेपालका लागि पूर्वी देशान्तरमा दुईवटा पोजिसनका स्लट नेपाललाई उपलब्ध गराएको छ । त्यसमा १२३.३ डिग्री देशान्तरमा स्याटलाइट सेयररिङ ब्यान्डअन्तर्गत पाँच सय मेगाहर्जमा विभिन्न ब्यान्ड उपलब्ध गराएको छ । अर्को ५० डिग्री देशान्तरमा १२ वटा च्यानलका ब्यान्ड उपलब्ध गराएको छ ।