'जर्मनी-मेक्सिको र पोर्चुगल-चिली' को भिडन्त

काठमाडौं : फिफा कन्फिडेरेशन कपको सेमिफाइनलमा विश्व विजेता जर्मनीले मेक्सिको सामना गर्ने भएको छ भने र अर्को सेमिफाइनलमा युरोप विजेता पोर्चुगल र अमेरिकी महादेशको विजेता चिली भिड्ने भएका छन्।

आइतबार राती भएको समूह बी का खेलमा जर्मनीले क्यामरुनलाई ३-१ ले पराजित गरी सेमिफाइनलमा पुग्न सफल भयो भने अस्ट्रलियासँग १-१ को बराबरी खेलेको चिलीले पनि सेमिफाइनलमा स्थान सुरक्षित गर्‍यो ।

प्रतियोगिता अन्तर्गत आइतबार राति भएको समूह 'बी' को आफ्नो अन्तिम खेलमा दक्षिण अमेरिकी क्षेत्रको विजेता चिली अस्ट्रेलियासँग १-१ को बराबरीमा रोकियो ।

४२ औं मिनेटमा जेम्स ट्रोइजीको गोल मार्फत अस्ट्रेलियाले खेलमा अग्रता लिएको थियो । पहिलो हाफमा १-० ले पछि परेको चिलीका लागि ६७ औं मिनेटमा रोड्रिग्वेजले बराबरी गोल गरे । त्यसपछि कुनै टोलीले गोल गर्न नसक्दा खेल बराबरीमै रोकियो । चिलीका लागि बराबरी नै सेमिफाइनलमा पुग्न पर्‍याप्त बन्यो ।

यसै समूहको आइबार राति भएको अर्को खेलमा विश्व विजेता जर्मनीले क्यामरुन लाई ३-१ गोल अन्तरले पराजित गर्न सफल भयो । जर्मनीका लागि टिमो वेर्नेरले दुई र केरेम डेमिरबेले एक गोल गरे भने क्यामरुनका लागि विन्सेन्ट अबुबाकरले गोल गरे । पहिलो हाफमा दुवै टोलीले कुनै गोल गर्न सकेका थिएनन् ४८ औं मिनेटमा डेमिरबेले गोल गर्दै जर्मनीका लागि अग्रता दिलाए । त्यसैगरी खेलको ६६ औं मिनेटमा वेर्नेरको गोल मार्फत जर्मनीले अग्रता दोब्बर बनायो । क्यामरुन तर्फबाट ७८ औं मिनेटमा अबुबाकरले गोल गरी खेलमा फर्कने प्रयास गरेका थिए । तर त्यसको तीन मिनेटपछि वेर्नेरले व्यक्तिगत दोस्रो गोल गरेपछि जर्मनीले ३-१ को सहज जित निकाल्यो ।

७ अंकसहित समूह 'बी' को विजेता बन्दै जर्मनी सेमिफाइलन पुग्यो भने ५ अंकसहित चिली समूह उपविजेता बनी सेमिफाइनल पुग्न सफल भयो । २ अंक रहेको अस्ट्रेलिया र १ अंक रहेको क्यामरुन समूह चरणबाट बाहिरिएका छन् ।

 समूह 'ए' बाट यसअघि नै मेक्सिको र पोर्चुगलले सेमिफाइनलमा स्थान पक्का गरिसकेका छन् । जर्मनीले समूह ए को उपविजेता मेक्सिकोको सामना  गर्नछ भने चिलीले समूह 'ए' को विजेता पोर्चुगसँग फाइनलका लागि प्रतिस्पर्धा गर्नेछ ।