काठमाडौं : कोपा अमेरिकाको फाइनलमा फुटबलको महारथी अर्जेन्टिनालाई दुई पटक हराउन सफल दक्षिण अमेरिकी राष्ट्र चिली रुसमा जारी फिफा कन्फिडेरेशन कप फुटबलको फाइनमा पुगेको छ । बुधबार राति भएको खेलमा युरोकप विजेता पोर्चुगललाई ट्राइब्रेकरमा ३-० ले हराउँदै चिली फाइनलमा पुग्न सफल भएको हो।
रुसको कजानमा भएको सेमिफाइनलमा खेलको निर्धारित ९० मिनेट र थप गरिएको ३० मिनेटमा पनि कुनै टोलीले गोल गर्न नसकेपछि खेल ट्राइब्रेकरमा गएको थियो । खेलमा दुवै टोलीका खेलाडीले गोलका लागि गरेको पटक-पटकको प्रयास सफल हुन सकेन ।
चिलीको जितमा गोलकिपर क्लउडियो ब्राभो नायक बने उनले । पोर्चुगलका तीन खेलाडीले प्रहार गरेको पेनाल्टी रोक्न सफल भएका थिए । ब्राभोले पोर्चुगलका रिकार्डो क्वारिज्मा, जोएओ मोटिन्हो र नानीको पेनाल्डी प्रहारको उत्कृ्ष्ट बचाउ गरेर टोलीलाई जितको हकदार बनाए ।
चिलीका तर्फबाट अटुरो भिडाल, कार्लेस एसान्गुइज र एलेक्स सान्चेज तीनै जनाले गरेको पेनाल्टी प्रहार गोलमा परिणत भएको थियो । चिलीले अब फाइनलमा बिहीबार राति मेक्सिको र जर्मनी बीच हुने सेमिफाइनलको विजेतासँग खेल्नेछ ।
प्रतिक्रिया दिनुहोस !
