आज निर्वाचन, को बन्दैछ भारतको १४ औं राष्ट्रपति ?

एजेन्सी : भारतको १४ औं राष्ट्रपतिका लागि सोमबार निर्वाचन हुँदैछ । राष्ट्रपतिका लागि सत्तारुढ भारतीय जनता पार्टी लगायत अन्य केही दलको पक्षबाट रामनाथ कोविन्द उम्मेदवार बनेका छन् भने, विपक्षी दल कांग्रेस लगायत अन्य केही दलको समर्थनमा मीरा कुमार प्रतिस्पर्धामा रहेकी छिन् । भारतीय राष्ट्रपति प्रणव मुखर्जीको कार्यकाल यही जुलाई २५ मा सकिँदै छ । भारतको माथिल्लो सदन राज्यसभा तल्लो सदन लोकसभा र सबै राज्यका विधान सभाका गरी ४८९६ जनाले राष्ट्रपति चयनका लागि मतदान गर्दै छन् ।

राष्ट्रपति चयनका लागि ४८९६ कानुन निर्माताहरुले मतदान गर्ने भएपनि त्यसको कूल भोट भ्यालु भने १० लाख ९८ हजार ९०३ रहेको छ । जसमा लोकसभाका ५४३ जना राज्य सभाका २३३ जना को भोट भ्यालु ५ लाख ४९ हजार ४०८ रहेको छ भने २९ राज्यका ४१२० विधान सभा सदस्यको भोट भ्यालु ५ लाख ४९ हजार ४९५ रहेको छ । यस मध्येबाट बहुमत प्राप्त गर्ने उम्मेदवार राष्ट्रपतिमा निर्वाचित हुने व्यवस्था रहेको छ।

लोकसभा र १७ राज्यको विधानसभामा भारतीय जनता पार्टीको बहुमत रहेकाले रामनाथकै पल्ला भारी रहेको देखिन्छ । उनको पक्षमा ६५ देखि ७० प्रतिशत मत प्राप्त हुने आँकलन गरिएको छ भने मीरा कुमारको पक्षमा ३०/३२ प्रतिशत मात्रै मत आउने अनुमान गरिएको छ ।

रामनाथको चुनावी अभियानका मेनेजरसमेत रहेका भारतीय जनता पार्टीका महासचिव भुपेन्द्र यादवले भारतीय मिडियासँग कुरा गर्ने क्रममा रामनाथलाई २१ मुख्य मन्त्री र ३० भन्दा बढी पार्टीको समर्थन रहेको दावी गरेका छन् ।

मतदाताको अंक गणित अनुसार ७१ वर्षीय रामनाथ कोविन्द भारतको राष्ट्रपतिमा निर्वाचित लगभग निश्चित रहेको देखिन्छ । यद्यपी भारतको राष्ट्रपति पद एक सम्मानित राष्ट्र प्रमुखको पद बाहेक केही होइन राष्ट्रपतिलाई कुनै पनि कार्यकारी अधिकार प्राप्त छैन । जो सुकै निर्वाचित भएपनि त्यसले भारतीय राजनीतिमा कुनै फेरबदल हुने भने देखिदैन् ।