केन्द्रीय डाँक परिवहन सेवाको तयारी
भरतपुर : सार्वजनिक यातायातबाट डाँक परिवहन सेवा प्रभावकारी नभएपछि सरकारले गाडी खरिद गरी केन्द्रीय डाँक परिवहन सेवा सुरु गर्ने तयारी थालेको छ । जिल्ला हुलाक कार्यालय चितवनबाट दुई साताभित्रै केन्द्रीय डाँक परिवहन सेवा सुरु गर्ने जनाएको हो । डाँक परिवहनका भरतपुरस्थित जिल्ला हुलाक कार्यालय परिसरमा चारवटा गाडी तयारी अवस्थामा राखिएका छन् ।
काठमाडौंको सुन्धारास्थित केन्द्रीय डाँक परिवहन सेवा भरतपुरबाट सञ्चालन गर्न आवश्यक प्रक्रिया सुरु भइसकेको जिल्ला हुलाक कार्यालय चितवनका कार्यालय प्रमुख नेत्रविलास पन्तले जानकारी दिए । ‘अबदेखि सरकारी गाडीमा सबै डाँक (चिठ्ठीपत्र, पार्सल) काठमाडौंबाट भरतपुर ल्याएर देशका सबै क्षेत्रमा पुर्याइनेछ', उनी भन्छन्, ‘साउन अन्तिम साताबाट दुईवटा गाडीले पूर्व क्षेत्रमा र दुईवटाले पश्चिम क्षेत्रमा डाँक परिवहन सेवा दिनेछन् ।'
चितवनबाट पूर्व र पश्चिमका चिठ्ठीपत्र एवं पार्सल छुट्याएर डाँक परिवहन सेवामार्फत सम्बन्धित जिल्लामा पठाइनेछ ।
पूर्वपश्चिम राजमार्गले छोएका जिल्लास्थित जिल्ला हुलाक र इलाका हुलाक कार्यालयमा सरकारी गाडीले डाँक पुर्याउने र ल्याउने जिल्ला हुलाक अधिकृत पन्त बताउँछन् । डाँक बोक्ने सरकारी गाडीमा चालक, सहचालक र तत्कालका लागि एक जना हुलाक कार्यालयकै कर्मचारी परिचालन गरिने पन्तको भनाइ छ ।
काठमाडौंस्थित हुलाक गोश्वारा कार्यालयमा ठाउँ अपर्याप्त भएको र सार्वजनिक यातायातबाट डाँक सेवा प्रभावकारी नभएपछि केन्द्रीय डाँक विनिमय केन्द्र चितवनमा सार्न लागिएको हो ।
केन्द्रको काम चितवनबाट सुरु भएपछि विदेशबाट काठमाडौं आइपुगेका चिठ्ठीपत्र र पार्सल गोश्वारा कार्यालयकै गाडीमा चितवनसम्म ल्याइनेछ । चितवनबाट पूर्व र पश्चिमका चिठ्ठीपत्र एवं पार्सल छुट्याएर डाँक परिवहन सेवामार्फत सम्बन्धित जिल्लामा पठाइनेछ । पहिले सार्वजनिक यातायातबाट ठेक्कामा डाँक विनिमय हुँदै आएको थियो । डाँक सेवालाई प्रभावकारी बनाउन जिल्लामा डाँक सेवा विनिमय केन्द्र स्थापना गरिएको जिल्ला हुलाक अधिकृत पन्तको भनाइ छ ।
हुलाक टिकटबाट ५६ लाख आम्दानी
गत आर्थिक वर्षमा जिल्ला हुलाक कार्यालय चितवनबाट ५६ लाख रुपैयाँको हुलाक टिकट बिक्री भएको छ । सरकारी कामको सिलसिलामा निवेदन दिन हुलाक टिकट प्रयोग हुँदै आएको छ । चिठ्ठीपत्र पठाउने क्रम कम भए पनि सरकारी कार्यालयमा दिइने निवेदनमा हुलाक टिकट टास्नुपर्ने प्रावधानले हुलाक टिकटको बिक्रीबाट राजस्व संकलन बढेको हो ।
जिल्ला हुलाक कार्यालयले गत आर्थिक वर्षमा आम्दानी गरेको कुल ९२ लाख २२ हजार रुपैयाँ राजस्वमध्ये हुलाक टिकट बिक्रीबाट ५६ लाख रुपैयाँ संकलन भएको छ । विदेशबाट पठाइने पार्सलको भन्सार कर र मूल्य अभिवृद्धि करबाट गत आर्थिक वर्षमा पाँच लाख २४ हजार रुपैयाँ संकलन भएको जिल्ला हुलाक कार्यालयले जनाएको छ । हुलाक कार्यालयले लोक सेवा आयोगको परीक्षा दस्तुरबाट १५ लाख ३८ हजार रुपैयाँ राजस्व संकलन गरेको छ । पाँच सय वाटसम्मको एफएम रेडियोको लाइसेन्स नवीकरण एवं रोयल्टी शुल्क र केबुल टीभी सञ्चालन इजाजतपत्रको नवीकरण एवं रोयल्टीको कामसमेत जिल्ला हुलाक कार्यालयबाट हुँदै आएको छ ।
प्रतिक्रिया दिनुहोस !
