२५ बैंकले कमाए ४३ अर्ब

काठमाडौं : आर्थिक वर्ष २०७३/०७४ मा २५ वटा वाणिज्य बैंकले ४३ अर्ब १० करोड ५० लाख रुपैयाँ कमाएका छन् । यो नाफा अघिल्लो आवमा ती बैंकले गरेको नाफाको तुलनामा करिब २५.६६ प्रतिशत बढी हो । गएको आवका २५ वटा वाणिज्य बैंकले ३४ अर्ब ३० करोड २७ लाख नाफा गरेका थिए । बैंकहरूले अत्यधिक कर्जा प्रवाह गरेका कारण उनीहरूको ब्याज आम्दानी बढ्दा नाफामा सहयोग पुगेको बैंकरले बताएका छन् । ‘पुँजी वृद्धिपछि बैंकहरूमाथि व्यावसायिक दायरा बढाउने दबाब थियो', नेपाल बैंकर्स एसोसिएसनका अध्यक्ष अनिलकेसरी शाहले भने, ‘त्यसले बैंकको नाफा बढ्नमा सहयोग पुगेको हो ।'

भूकम्प र नकाबन्दीका कारण अधिक तरलता खेपीरहेका बैंकहरूले त्यसपछिका दिनमा लगानी बढाउँदा नाफा बढ्न थालेको हो । वित्तीय क्षेत्रको नाफा बढ्नुको श्रेय राम्रो र क्षमतावान जनशक्तिमा जाने अध्यक्ष शाहले बताए । ‘बर्सेनि नाफा बढ्दै जानु यस क्षेत्रका लागि सकरात्मक र आम जनताको विश्वास जित्दै जानु हो', उनले भने । उनका अनुसार पछिल्लो समय लगानीका क्षेत्र विस्तार हुँदै जानुले पनि नाफा बढ्न सहयोग पुगेको हो । कृषि, ऊर्जा, उत्पादनमूलक, हायर पर्चेज, घरजग्गा, अटोलगायतका कर्जा बढ्दै गएको छ ।

आर्थिक वर्ष सुरु भएदेखि अन्तिमसम्म उत्तिकै कर्जा प्रवाह गर्न सकेको भए नाफा अझ बढ्ने सानिमा बैंकका प्रमुख कार्यकारी अधिकृत भुवन दाहालले बताए । ‘पहिलो ६ महिनाबाटै क्रेडिट क्रन्चका कारण बैंकहरूले लगानी गर्न सकेनन् उनले भने, ‘ मागअनुसारको कर्जा प्रवाह गर्न सकिएको भए बैंकहरूले राम्रै कमाउने थिए । हालसम्म वित्तीय विवरण सार्वजनिक गरेका बैंकहरूमध्य अपरिस्कृत वित्तीय विवरणअनुसार चारवटा बैंकको नाफा तीन अर्बभन्दा माथि छ ।

नबिल, नेपाल इन्भेस्टमेन्ट, राष्ट्रिय वाणिज्य र नेपाल बैंकको नाफा तीन अर्बभन्दा माथि पुगेको हो । सरकारी स्वामित्वका दुई बैंकसँगको प्रतिस्पर्धामा निजी बैंक थपिएका छन् । अघिल्लो वर्षसम्म तीन अर्ब नाफा नघाउन नसकेका बैंकहरूले पुँजी वृद्धिसँगै लगानी बढाएका कारण नाफा पनि वृद्धि भएको हो । गएको वर्ष कृषि विकास बैंकको नाफा पौने तीन अर्ब पुगेको छ भने ग्लोबल आईएमई बैंकको नाफा पनि दुई अर्बभन्दा माथि छ ।

बैंकहरूले अत्यधिक कर्जा प्रवाह गरेका कारण उनीहरूको ब्याज आम्दानी बढ्दा नाफामा सहयोग पुगेको हो ।

वित्तीय विवरण आएका बैंकहरूको नाफा आधाभन्दा माथि छ । २८ वाणिज्य बैंकमध्य हालसम्म २५ वटा वाणिज्य बैंकले गएको आर्थिक वर्षको वित्तीय विवरण सार्वजनिक गरेका छन् । गएको आवमा आक्रमक ढंगबाट लगानी वृद्धि गरेपछि नाफा पनि बढेको बैंकर्सको भनाइ छ । अघिल्लो आवमा दुई अर्ब ८१ करोड नाफा कमाएको नबिल बैंकको नाफा २८.४२ प्रतिशतले बढेर गएको वर्ष तीन अर्ब ६२ करोड पुगेको छ । राष्ट्रिय वाणिज्य बैंकको नाफा पनि दुई अर्ब ३५ करोडबाट बढेर तीन अर्ब आठ करोड पुगेको छ ।

नेपाल इन्भेस्मेन्ट र नेपाल बैंकले गएको वर्ष तीन १६ करोड नाफा गरेको छन् । कृषि विकास बैंकले नाफा अघिल्लो आवको तुलनामा ३१ करोड तीन लाखले बढेर दुई अर्ब ७७ करोड पुगेको छ । यस्तै ग्लोबल आईएमईले पनि यस वर्ष ४७.४५ प्रतिशतले नाफा बढाएर दुई अर्ब तीन करोड ८१ लाख पुर्‍याएको छ । हिमालयन बैंकको नाफा पनि दुई अर्ब नाघेको छ ।

प्रभु एनएमबी, एनआईसी एसिया, प्राइम कमर्सियल, सिटिजन बैंक इन्टरनेसनल तथा सिद्धार्थ बैंकले नाफा अघिल्लो वर्ष र गएको वर्ष अर्ब माथि नै छ । यस वर्ष अर्ब नाफा गर्न गरेर अर्ब कमाउने बैंकको सूचीमा प्राइम कमर्सियल, एनएमबी, प्रभु सानिमा, लक्ष्मी, एनआईसी एसिया, स्याडन्र्ड चार्टर्ड, एसबीआई, एभरेस्ट र सनराइज बैंकले पनि गएको आवमा भने अर्बभन्दा माथि मुनाफा गरेका छन् ।

गएको वर्ष अर्बभन्दा कम नाफा कमाउने बैंकमा मेगा, जनता, कुमारी बैंक भने थोरै नाफा कमाउने बैंकमा परेका छन् । जनता बैंकले ६४ करोड नाफा कमाएको छ भने मेगा बैंकले ७९ करोड आर्जन गर्दा कुमारी बैंकले ७० करोड नाफा आर्जन गरेको छ । सिभिल बैंक, एनसीसी बैंक र सेन्चुरी बैंकले भने वित्तीय विवरण सार्वजनिक गरेका छैनन् ।