सिरहाका १७ तहमध्ये ८ मा एमाले अगाडि
सिरहा : सिरहाका १७ वटै स्थानीय तहमा भएको प्रारम्भिक मगणनाअनुसार ८ स्थानीय तहमा एमाले अगाडि देखिएको छ । उपेन्द्र यादव नेतृत्वको संघीय समाजवादी फोरम ४, माओवादी केन्द्र ३ र कांग्रेस २ स्थानीय तहमा प्रमुख पदमा अगाडि छ । प्रारम्भिक नतिजाअनुसार एमालेले जिल्लाको भगवानपुर, सखुवा ननकारकट्टी, विष्णुपुर, नवराजपुर गाउँपालिका, लहान, सुखिपुर र कर्जन्हा नगरपालिकामा अगाडि छ । लहान नगरपालिकामा राप्रपाका मेयर उम्मेदवार लगनलाल चौधरीभन्दा ३० मतले एमालेका मेयर उम्मेदवार मुनी साह अगाडि छन् । दुवै प्रतिस्पर्धी लहानका पूर्वमेयर हुन् ।
माओवादी केन्द्रले मिर्चैया नपा, गोलबजार नपा र अर्नमा गापामा अग्रता लिएको छ । मिर्चैया र गोलबजार नगरपालिका माओवादी केन्द्रका अध्यक्ष प्रचण्डको निर्वाचन क्षेत्रमा पर्छ । यही क्षेत्रबाट प्रचण्ड दोस्रो संविधानसभा चुनावमा निर्वाचित भएका थिए । संघीय समाजवादी फोरम नेपालले औरही, लक्ष्मीपुर पतारी, बरियारपट्टी गाउँपालिका र सिरहा नगरपालिकामा अगाडि छ । औरही गाउँपालिकामा फोरमका प्रमुख पदका शिवजी यादवले सुरुदेखि नै धेरै मतले अगाडि देखिएपछि उनी निर्वाचित हुने पक्काजस्तै भएको छ । सिरहा नगरपालिकामा पनि सुरुदेखि नै फोरमका मेयर उम्मेदवार अशेश्वर यादव अगाडि छन् ।
नेपाली कांग्रेसले धनगढी र कल्याणपुर नगरपालिकामा अग्रता लिएको छ । कांग्रेसले सिरहाका अधिकांश स्थानीय तह जित्ने दाबी गरेका थिए । तर, मतपरिणाम सार्वजनिक हुँदा निकै पछाडि परेको देखिन्छ । सिरहामा राष्ट्रिय जनता पार्टी (राजपा)को हालत पनि कमजोर बनेको छ । १७ मध्ये १४ स्थानीय तहमा मात्र उम्मेदवार खडा गरेका राजपा कुनै पनि स्थानीय तहमा अगाडि छैन ।
सात वडाको नतिजा सार्वजनिक
सिरहाका १७ स्थानीय तहका १६४ वडामध्ये ७ वडाको मतपरिणाम सार्वजनिक भएको छ । लहान नगरपालिका-२ मा कांग्रेसका सीयाराम यादव वडाध्यक्षमा विजयी भएका छन् । कर्जन्हा गाउँपालिका-१ मा माओवादी केन्द्रका मोहनबहादुर खत्रीले वडाध्यक्षमा जितेका छन् । धनगढीमाई नपा १ मा एमालेका सुर्यनारायण महतो वडाध्यक्ष भएका छन् । कल्याणपुर नपा-१ मा राजपाका जयराम कामती वडाध्यक्षमा विजयी भएका छन् । कल्याणपुर नपा-२ मा वडाध्यक्ष विशेश्वर मुखिया बनेका छन् । उनी पनि राजपाका उम्मेदवार हुन् । औरही गाउँपालिका-१ मा संघीय समाजवादी फोरम सुमितलाल ठाकुर वडाध्यक्ष निर्वाचित भएका छन् । संघीय समाजवादी फोरमकै बद्रिनारायण यादव भगवानपुर गाउँपालिका-१ मा वडाध्यक्ष बनेका छन् ।
लहान र कर्जन्हाको मतगणना अवरुद्ध
उता, सिरहा जिल्लाको कर्जन्हा गाउँपालिका र लहान नगरपालिकाको मतगणना अवरुद्ध बनेको छ । लहान नपाको मतगणना मंगलबार दिउँसो १ बजेबाट र कर्जन्हा गाउँपालिकाको मतगणना दिउँसो करिब ३ बजेबाट अवरुद्ध भएको हो । कर्जन्हा-३ मा खसेको मतभन्दा १३ मतपत्र बढी भेटिएपछि मतगणना स्थगन भएको जिल्ला निर्वाचन कार्यालय सिरहाले जनाएको छ । यस्तै, लहान-३ मा कांग्रेसका वडाध्यक्ष रामदयाल महतोले फोरमले ल्याएको भन्दा मात्र ८ मत बढी ल्याएर निर्वाचित भए । त्यसपछि फोरमका प्रतिनिधिले गडबड गरेको कांग्रेस वडाध्यक्षलाई जितायो भनेर विरोध गरेपछि मतगणना स्थगन भयो ।
कर्जन्हा गाउँपालिका-३ मा १३ सय ९ मत खसेको थियो । तर, मतगणनाक्रममा भने १३ सय २२ मत भेटियो । यस्तै, लहान नगरपालिकामा पनि मतगणनाको विषयमा विवाद भएपछि दिउँसो १ बजेबाटै मतगणना अवरुद्ध बनेको छ । साँझ ८ बजेसम्म पनि विवाद सुल्झेन ।
जनकपुरमा राजपाको सुरुवाती अग्रता
उता, जनकपुर उपमहानगरपालिकामा राजपा नेपालले सुरुवाती अग्रता लिएको छ । २५ वडामध्ये १, २, ३ र ४ वडाको मतगणनामा राजपाको अग्रता देखिएको छ । राजपा नेपालले ४ सय मत गनिँदासम्म मेयरमा २२४ र उपमेयरमा १३३ मत प्राप्त गरेको थियो भने कांग्रेस मेयरमा ९७ र उपमेयरमा ४७ मत ल्याएर निकट प्रतिद्वन्द्वी बनेको छ ।
निर्वाचन आयोगको व्यवस्थापकीय त्रुटिका कारण निकै ढिलो गरी दिउँसो २ बजेदेखि जनकपुरको महेन्द्रनारायण निधि सांस्कृतिक संग्रहालयमा सुरु भएको मतगणना ढिलाइ भइरहेको छ । सर्वदलीय बैठकबाट बिहान १० बजेदेखि नै मतगणना गर्ने निर्णय भए पनि आयोगको ढिलासुस्तीले अबेर भएको हो । कडा सुरक्षा व्यवस्थाबीच तारजालीले घेरेको सभाकक्षमा मतगणना भइरहेको छ ।
१८ स्थानीय तह रहेको धनुषामा ५ वटा स्थानीय तहमा मतगणना सोमबार अबेर रातिदेखि नै सुरु भएर वडामा नतिजासमेत सार्वजनिक हुन थालिसकेको हो । जिल्लाको गणेशमान चारनाथ नपा-११ मा माओवादी केन्द्रका सत्यनारायण कुँवर प्यानलसहित विजयी भएका हुन् । गणेशमान चारनाथ नगरपालिका-११ मा वडाध्यक्षमा माओवादी केन्द्रका सत्यनारायण कुँवर, जनकनन्दनी गाउँपालिका-१ मा संघीय समाजवादी फोरमका धर्मेन्द्र गोइत विजयी भएका हुन् । त्यसैगरी, सबैला नगरपालिका-१ मा माओवादी केन्द्रका कपिल राउतको प्यानल विजयी भएको छ ।
अधिकांश मतदान केन्द्रमा मतदान अधिकृतले सञ्चारकर्मीसँग सम्पर्क नगर्ने, फोन गर्दा पनि नउठाउने र एकद्वारप्रणालीबाट सूचना दिने कुनै व्यवस्था नभएको कारण मतपरिणाम थाहा पाउन निकै गाह्रो भएको हो ।