लाहानमा अवरुद्ध मतगणना सुरु
सिरहा : विवादका कारण अवरुद्ध बनेको लहान नगरपालिकाको मतगणना बिहानबाट सुरु भएको छ । वडा नम्बर ३ मा नेपाली कांग्रेसका वडाध्यक्ष रामदयाल महतोले ८ मतले जितेपछि फोरमका प्रतिनिधिले गडबड गरेको भन्दै पुनः मतगणनाको माग गरेपछि हिजो दिउँसो १ बजेबाट अवरुद्ध बनेको थियो ।
मंगलवार राति बसेको सर्वदलीय बैठकबाट विवादित वडाको मतपेटिका पोका पारेर राख्ने र आयोगले जे निर्णय गर्छ, उही मान्ने भनेर दलका प्रतिनिधिहरुबीच सहमती बनेपछि मतगणना सुरु भएको निर्वाचन अधिकृतको कार्यालय लहानले जनाएको छ । अहिले वडा नम्बर १, ४ र ६ मतगणना जारी छ । वडा नम्बर २ र ८ को मतपरिणाम भने सार्वजनिक भइसकेको छ ।
वडा नम्बर २ मा नेपाली कांग्रेसका वडाध्यक्ष सियाराम यादब मंगलवार नै निर्वाचित भए भने आज बिहान वडा नम्बर ८ मा संघीय समाजवादी फोरम नेपालका वडाध्यक्ष विजयकुमार महतोको प्यानल नै निर्वाचित भएको छ ।
लहान नगरपालिकामा एमालेका मेयर उम्मेदवार मुनी साह अग्रता कायम राखेका छन् । उनले १६ सय १६ मत ल्याएर अगाडी छन् । उनलाई राप्रपाका मेयर उम्मेदवार लगनलाल चौधरीले पछ्याइरहेका छन् । नेपाली कांग्रेसका मेयर उम्मेदवार अचमितलाल चौधरी १२ सय ८८ मत ल्याएर तेस्रो स्थानमा छन्।
यसैबीच कर्जन्हा गाउँपालिकामा पनि मंगलवार दिउँसोबाटै अवरुद्ध बनेको मतगणना रातिबाट सुरु भएको छ । निर्वाचन आयोगले बढी फेला परेको मतलाई पनि वैध मानेर गणना गर्न भनेपछि सोही अनुसार मतगणना अगाडी बढाएको जिल्ला निर्वाचन अधिकारी इन्दिरा यादबले बताइन् ।
तर एमालेले आयोगको निर्णय नमानेर आफ्ना प्रतिनिधिलाई मतगणना स्थलबाहिर बोलाएको छ ।