दुई मन्त्री चुनाव लड्दै

बैतडी : बैतडीमा वहालवाला राज्यमन्त्री र पूर्व राज्यमन्त्री चुनावी मैदानमा उत्रेका छन् । नेपाली कांग्रेस र राप्रपाको लोकतान्त्रिक गठबन्धनबाट नेपाली कांग्रेसका नेता एवं वाणिज्य राज्यमन्त्री नरबहादुर चन्द र एमाले र माओवादीको बामगठबन्धनबाट एमालेका नेता एवं पूर्व अर्थराज्यमन्त्री दामोदर भण्डारी प्रतिनिधि सभा सदस्यका लागि चुनावी मैदानमा उत्रेका हुन् ।

लोकतान्त्रिक गठबन्धनबाट उम्मेद्वार बनेका चन्द र बाम गठबन्धनबाट उम्मेद्वार बनेका भण्डारी २०७० सालको निर्वाचन विजयी भएका थिए । त्यो बेला दुई क्षेत्र रहेको बैतडीमा क्षेत्र नं २ बाट कांग्रेसका नरबहादुर चन्द र क्षेत्र नं १ बाट एमालेका दामोदर भण्डारीले चुनाव जितेका थिए । निर्वाचन क्षेत्र निर्धारण आयोगले बैतडीमा प्रतिनिधि सभाका लागि एक मात्रै क्षेत्र बनाएपछि दुवै नेता प्रतिनिधिसभा सदस्यका लागि चुनावी मैदानमा उत्रेका हुन् ।

आइतबार मनोनयन दर्ता पछि प्रतिनिधिसभामा दुवै नेता चुनाव जित्ने दाबी गरेका छन् । प्रतिनिधिसभाका लागि दुवै उम्मेद्वारबीच कडा प्रतिस्पर्धा हुने आँकलन समेत गरिएको छ । ‘लोकतन्त्रको रक्षाको लागि प्रजातान्त्रिक शक्ति एक भएर चुनावी मैदानमा उत्रेको हौं । लोकतन्त्र चाहने नागरिकले मलाई भोट दिन्छन् ।'काँग्रेस उम्मेद्वार नरबहादुर चन्दले भने, ‘लोकतान्त्रिक संविधान निर्माण गरेका छौं ।

त्यसको कार्यान्वयनका लागि लोकतन्त्रवादीका जीत आवश्यक छ ।' यता बाम गठबन्धनबाट प्रतिनिधिसभा सदस्यका लागि उम्मेद्वारी दिएका एमाले नेता दामोदर भण्डारीले आफूले चुनाव जित्ने दाबी गरेका छन् । ‘बाम गठबन्धन कसैप्रति लक्षित छैन । यो देशको राष्ट्रिय आवश्यकता हो । बाम गठबन्धनबाट हामी चुनाव जित्छौं ।'उनले भने, ‘संविधान निर्माणको बेला संसद र सरकारमा रहँदा भूमिका निभाएको हुँ । संविधान कार्यान्वयनको भूमिका पनि जनताले दिनेछन् ।'

बहालवाला राज्यमन्त्री र पूर्वराज्यमन्त्री चुनावी मैदानमा देखिएपछि अहिले कसले बाजी मार्ला भन्ने बहस हुन थालेको छ । पूर्व प्रधानमन्त्री लोकेन्द्रबहादुर चन्दको गृह जिल्ला बैतडीमा नेपाली कांग्रेसले राप्रपासँगको गठबन्धन गरेको छ । कांग्रेसँगको चुनावी तालमेललाई राप्रपाले आफ्नो अस्तित्वको बिषयसँग जोडेको राप्रपाका नेता नन्दराज भट्टले बताए । उनले भने ‘प्रजातान्त्रिक शक्ति एक भयौं भने कसैले हामीलाई जित्न सक्तैनन् । राजनीतिक इमान्दारीता प्रर्दशन गर्ने बेला आएको छ ।'

दशबर्षे सशस्त्र द्वन्द्वबाट आएको माओवादीसँगको सहकार्य एमालेका लागि चुनाव जित्ने सहज बाटो हुने नेताहरुले बताइरहेका छन् । ‘हाम्रो एकै विचारधारा छ । एकै सिद्धान्त छ । अहिले सम्म फरक बाटो हिडेका थियौं । अब एक बाटोमा हिडेका छौं । हाम्रो जीत सुनिश्चित छ ।'बामगठबन्धनका तर्फबाट प्रदेशसभाका लागि बैतडी क्षेत्र (क)बाट उम्मेद्वार बनेका प्रेमप्रकाश भट्टले भने ।

जिल्लामा लोकतान्त्रिक गठबन्धन र बाम गठबन्धनसँगै दुवैजना मन्त्री भएकाहरु चुनावी मैदानमा आएपछि परिणामका बारेमा यसै होला भन्ने आँकलन गर्न नसकिएको जगन्नाथ बहुमुखी क्याम्पस गोठलापानीका क्याम्पस प्रमुख पृथ्वीराज अवस्थीले बताए । उनले भने ‘अहिले दलहरु भिन्न तरीकाले चुनावी मैदानमा उत्रेका छन् । जनता सामु आफ्ना एजेण्डा कसरी प्रस्तुत गर्छन् । त्यसले निर्वाचन परिणामलाई निर्धारण गर्नेछ ।'