यसरी सम्झना गरियो राजा वीरेन्द्रलाई
काठमाडौ : स्वर्गीय राजा वीरेन्द्रको ७३ औँ जन्मजयन्तीको अवसरमा ‘श्री ५ वीरेन्द्र एक बहुआयामिक व्यक्तित्व’ विषयक गोष्ठी शुक्रबार भएको । कार्यक्रममा सहभागी वक्ताले उनी कुशल नेतृत्वकर्ता एवं राजनीतिक विश्लेषक भएको धारणा राखेका छन् ।
राजा वीरेन्द्रले मुलुक र जनताको हितमा योगदान गरेका कारण उनलाई राष्ट्रवादी नेताका रुपमा सदैव नयाँ पुस्ताले सम्मान गर्नुपर्नेमा उनीहरुको जोड छ ।
राष्ट्रिय प्रजातन्त्र पार्टीद्वारा आयोजित कार्यक्रममा पार्टीका वरिष्ठ नेता एवं पूर्वप्रधानमन्त्री लोकेन्द्रबहादुर चन्दले राजा वीरेन्द्रले मुलुकका सबै क्षेत्रमा सन्तुलित विकास गर्ने उद्देश्यले पाँच विकास क्षेत्रको अवधारणा ल्याएको स्मरण गर्दै वीरेन्द्र देश र जनतालाई माया गर्ने अभिभावकका रुपमा आफूले पाएको विचार व्यक्त गरे ।
पार्टी अध्यक्ष कमल थापाले नेपालको भौगोलिक अवस्थालाई बुझेर यहाँ हुन सक्ने हस्तक्षेपलाई रोक्न शान्ति क्षेत्रको प्रस्ताव प्रस्तुत गरेर वीरेन्द्रले दूरदर्शिता देखाएको बताए ।
नेकपा मालेका महासचिव सिपी मैनालीले विसं २०४६ सालमा भएको आन्दोलन दबाउनका लागि दक्षिणबाट आएका राष्ट्रघाती सन्धिका प्रस्तावलाई अस्वीकार गरेर राजा वीरेन्द्रले जनतालाई अधिकारसम्पन्न बनाउन योगदान गरेको बताए ।
पूर्वमन्त्री रमेशनाथ पाण्डेले मुलुकमा नयाँ शिक्षा नीति कार्यान्वयनका लागि राजा वीरेन्द्रले देखाएको अग्रसरताको प्रशंसा गरे । उनले राजा वीरेन्द्रले दुवै छिमेकी मुलुकसँग सन्तुलित सम्बन्ध कायम गरेर मुलुकको अस्तित्वलाई संरक्षण गरेको बताए । २०५८ साल जेठ १९ गते भएको दरबार हत्याकाण्डमा परी वीरेन्द्रसहित उनका परिवारको निधन भएको थियो । रासस