खानेपानी आपुर्ति सहज बनाउन दाङका खोलामा हाईड्याम निर्माण गरिने
दाङ : दाङका खोलामा हाइड्याम निर्माण गर्न सम्भाव्यता अध्ययन शुरु गरिएको छ । जिल्लाको पातु खोला, कटुवा खोला र ग्वार खोलामा खानेपानी आपुर्ति सहज बनाउने उदेश्यले हाईड्याम निर्माण गर्न सम्भाव्यता अध्ययन गरिएको हो ।
खानेपानी तथा ढल निकास विभागले पातु खोलामा हाइड्याम निर्माण गर्न डिपिआर सुुरु गरेको र दुबै खोलामा हाईड्याम निर्माण गर्नेबारे प्रारम्भिक सम्भाव्यता अध्ययन गरेको छ । बढ्दो शहरीकरणले खानेपानीको आपुर्तिमा समस्या भइरहेको र समाधानकोलागि हाईड्याम निर्माण गर्न अध्ययन सुरु भएको विजौरी खानेपानी उपभोक्ता समितिका अध्यक्ष प्रदिप गौतमले बताए ।
विभागका इन्जिनियर ऋषिकेश पोख्रेल, नवीन आचार्य, सुलभ लिगल, खानेपानी तथा सरसफाई डिभिजन कार्यालयका दाङका प्रमुख चोकप्रसाद धिताल लगायतको टोलीले अध्ययन गरेको हो ।
खोलामा जलाशय निर्माण गरि खानेपानी तथा सिचाईको व्यवस्थापन गर्न अध्ययन शुरु गरिएको खानेपानी डिभिजन कार्यालय दाङका प्रमुख चोकप्रसाद धितालले बताए । यसरी जलाशय निर्माण गरिए दाङलाई वर्षौ सम्म खानेपानीको समस्या नहुने उनको भनाइ छ ।
अध्ययन पछि तयार पारिएको प्रतिवेदनलाई आधार मानेर योजना निर्माण भइ बजेट विनियोजन हुने र काम सुरु हुने उनको भनाई छ । तर त्यसकालागि सबैको चासो र पहल आवश्यक रहेको बताए ।
उनले दाङ लगायत विभिन्न क्षेत्रमा रहेका ठाडा खोलामा हाईड्याम निर्माण गर्नका लागि सरकारले चासो दिईरहेको समेत बताए ।
प्रतिक्रिया दिनुहोस !
