जनावरको हड्डी समेत भारततर्फ तस्करी

विराटनगर : मासु प्रशोधन केन्द्रबाट गाई, गोरु, भैंसी, राँगा, बंगुर आदी जनावरको हड्डी भारततर्पm तस्करी हुने गरेको पाइएको छ । सुनसरीको दुहवीमा संचालित सांग्रिला इन्टरनेशनल फुड प्रालीले जनावरको हड्डी भारत तर्फ लाँदै गरेको अवस्थामा को २ त ७९२ नम्बरको ट्रयाक्टर प्रहरीले नियन्त्रणमा लिएको छ ।

इलाका प्रहरी कार्यालय रानीबाट खटिएको टोलीले विराटनगर १८ मटेरुवा नाकाबाट चार सय मेट्रिक्टन हड्डी सहित भद्रपुर ९ का ३२ वर्षीय देवु किस्कु समेतलाई पक्राउ परेको छ ।  ‘मासु प्रशोधनका क्रममा निस्किएको हड्डी भारततर्फ अवैध तस्करी हुने गरेको रहेछ,’ प्रहरी निरीक्षक सन्तोष निरौलाले भने, ‘तस्करी नियन्त्रणका लागि सीमा क्षेत्रमा उच्च सतर्कता अपनाइएको छ ।’

पशु क्वारेन्टाइन कार्यालयका प्रमुख डा. फेकन साहले पाँच हजार रुपैयाँ जरिवाना गरेर ट्रयाक्टर र हड्डी छाडिएको बताए । ‘अवैध रुपमा चौपायको हड्डी भारततर्फ लैजान मिल्दैन । यसका लागि छुट्टै प्रक्रिया छ ।’ उनले भने, ‘पशु क्वारेन्टाइनमा चेकजाँच गरेर प्रमाणित भएपछि भन्सार महशुल बुझाएर हड्डी भारत लैजान मिल्छ’। उनले आवश्यक प्रक्रिया पूरा नगरी चौपायको हड्डी भारत लैजाँदै गरेको पाईकोले पक्राउ गरिएको जानकारी दिए ।

उता मासु प्रशोेधन केन्द्रका इन्चार्ज जाकिर हुसेनले भन्सार बुझाइ क्वारेन्टाइनमा चेकजाँच गरेर मात्र हड्डी भारत लैजाने विषयमा जानकारी नभएको बताए । उनले पहिलो पटक प्रहरीले हड्डी नियन्त्रणमा लिएको पनि दाबी गरे ।