काभ्रेपलाञ्चोकमा भएका छुट्टाछुट्टै दुर्घटनामा दुईको मृत्यु
काभ्रेपलाञ्चोकमा भएका छुट्टाछुट्टै दुर्घटनामा घाइते भएका दुईको सोमबार मृत्यु भएको छ ।
आइतबार बेलुका धुलिखेल नगरपालिका – ११ पात्लेखेतमा काठमाडौबाट ओखलढुंगा जाँदै गरेको बा३ख ५९५५ नम्बरको यात्रुबाहक बसले सोही बसमा सवार काभ्रेपलाञ्चोक नमोबुद्ध नगरपालिका–१ की ३७ वर्षीया फूलमाया तामाङलाई ठक्कर दिएको थियो । उनको धुलिखेल अस्पतालमा उपचारका क्रममा सोमबार बिहान मृत्यु भएको जिल्ला प्रहरी कार्यालयका निरीक्षक रविराज थपलियाले बताए ।
त्यस्तै पाँचखाल नगरपालिका–८ खावामा आइतबार बेलुका धुलिखेलबाट दोलालघाटतर्फ जाँदै गरेको बा ७१प २०१५ नम्बरको मोटरसाइकललाई विपरीत दिशाबाट आउँदै गरेको ना १ ज १८८४ नम्बरको सुमो गाडीले ठक्कर दिँदा मोटरसाइकल चालक २३ वर्षीय ललितपुर टीकाथली नगरपालिका–४ बस्ने विनय देउजाको मुत्यु भएको छ । उनको धुलिखेल अस्पतालमा उपचारका क्रममा सोमबार बिहान मृत्यु भएको प्रहरीले जनाएको छ ।
सोही दुर्घटनामा घाइते भएकी २३ वर्षीया अमिता आचार्यको धुलिखेल सामुदायिक अस्पतालमा उपचार भइरहेको प्रहरीको भनाइ छ । रासस