‘पूर्वराजा ज्ञानेन्द्र भन्छन् : 'भन्नुपर्ने केही छैन'

बर्दिया : बर्दिया सदरमुकाम गुलरियास्थित बंगलामुखी मन्दिर दर्शन गर्न पूर्वराजा ज्ञानेन्द्र शाह मंगलबार बर्दिया पुगेका छन् । सदरमुकाम गुलरिया आएका शाहलाई हजारौं बर्दियावासीले भव्य स्वागत गरेका हुन् । केही दिनअघि नेपालगन्ज आएका शाह नागरिक समाजको निमन्त्रणामा बर्दिया आउने कार्यक्रम तय भएको हो । नेपालगन्जदेखि आफैं ड्राइभिङ गरेर बर्दिया आएका पूर्वराजा ज्ञानेन्द्र प्रसन्न मुद्रामा देखिन्थे । करिब ४ सय मिटर लामो जनताको भीडमा हिँडेरै शाहले फूलमालालगायत स्वागत ग्रहण गरे । बर्दियाको ऐतिहासिक बगलामुखी मन्दिरमा ब्राह्मणले स्वस्तीवाचनसहित पूर्वराजाको स्वागत गरेका थिए ।

शाहले केही बेर बगलामुखी भगवती मन्दिरभित्र बसेर पूजा गरेका छन् । पूजा सकेर ५ मिनेट मञ्चमा वि श्राम गरेका शाहले पञ्चकन्यासँग फोटोसमेत खिचाए । बालबालिकालगायत वृद्धवृद्धासँग उनले प्रेमपूर्वक भेट गरेका थिए । पूर्वराजासँग सेल्फी खिचाउनेको भीड थियो । स्वागतका क्रममा विभिन्न राजनीतिक दलका कार्यकर्तासमेत सहभागी थिए । शाह गाडीबाट ओर्लेदेखि नफर्कंदासम्म समर्थकले ‘राजा आऊ, देश बचाऊ', ‘हाम्रो राजा हाम्रो देश प्राणभन्दा प्यारो छ' जस्ता नारा लगाएका थिए ।

पूर्वराजा शाहले सञ्चारमाध्यमसँग भने केही बोल्न चाहेनन् । भ्रमणबारे सञ्चारकर्मीले जिज्ञासा राख्दा भन्नुपर्ने केही नभएको शाहले बताए । बर्दियाका नागरिक समाज, विभिन्न राजनीतिक दलका कार्यकर्ता, स्थानीयवासी, बगलामुखी मन्दिर व्यवस्थापन समितिले पूर्वराजा ज्ञानेन्द्र शाहलाई बर्दियामा भव्य स्वागत गरेका हुन् ।

 

बर्दिया भ्रमणमा पूर्वराजा ज्ञानेन्द्र शाह ।