काठमाडौं: पूर्व प्रधानमन्त्री तथा नेकपा माओवादी केन्द्रका अध्यक्ष प्रचण्डले बाम गठबन्धन तोडेर प्रधानमन्त्री हुने कल्पना आफूले नगरेको बताएका छन् ।
बुधबार दिउँसो पार्टी कार्यालय, पेरिसडाँडामा पत्रकारसँग संक्षिप्त कुराकानी गर्दै अध्यक्ष प्रचण्डले यसो भनेका हुन् । ‘हामीले वाम गठबन्धन बनाएर चुनाव लड्यौं, लाखौं कार्यकर्ता र करोडौं जनताले वाम गठबन्धन र पार्टी एकतालाई अनुमोदन गरिसकेका छन्', उनले भने, 'अब त्यसबाट दायाँबायाँ हुने कल्पना पनि गर्न सकिँदैन । वाम गठबन्धन तोडेर प्रधानमन्त्री हुने कल्पना पनि गरेको छैन । मिडियामा भ्रमहरु आएका छन्, त्यसमा कुनै सत्यता छैन ।’
पार्टी एकताबारे एमालेसँग कुनै विमत्ति नरहेको स्पष्टिकरण उनले दिए । ‘पार्टी एकताबारे हामीमा कुनै विवाद र बिमति छैन । पार्टी एकता संयोजन समितिमा ओलीजी र मलाई शीर्ष नेताको रुपमा राखिएको छ । हामी दुवैबीच उपर्युक्त कार्य विभाजन हुन्छ, त्यसमा कुनै समस्या छैन’, प्रचण्डले भने,‘हामीले पुल भत्काएर अघि बढिसकेकाले अब पनि पार्टी एकता हुँदैन कि भनेर शङ्का गर्नु भ्रम मात्र हुन जान्छ । ओलीजीको स्वास्थ्यमा थोरै समस्या आएकाले एक, दुई दिन ढिलो भएको हो, छिट्टै हामी बस्छौं, पार्टी एकता संयोजन समितिमा छलफल गर्ने एजेण्डा टुङ्गाउँछौं र एकताको प्रक्रिया अगाडि बढाउँछौं ।’
बुधबार नै एमाले र माओवादी केन्द्रनिकट बुद्धिजीवी संगठनले संयुक्त रुपमा पेरिसडाँडामा आयोजना गरेको कार्यक्रममा अध्यक्ष प्रचण्डले त्यही कुरा दोहोर्याए ।
‘पहिलो र दोस्रो विश्व युद्धताका लेनिनले बुद्धिजीवीहरु अवसरवादी हुन्छन् भन्नुभयो । तर, अहिले दुनियाँ त्यहाँ छैन । विज्ञान, प्रविधि र अनुसन्धानमा आएको विकासले बुद्धिजीवीको परिभाषा र भूमिका फेरिएको छ', उनले भने, 'पछिल्ला राजनीतिक परिवर्तनहरुमा बुद्धिजीवीहरुको निकै सकारात्मक भूमिका रहँदै आएको छ । हामीले वाम गठबन्धन बनाउँदा राजनीतिक स्थिरता र आर्थिक समृद्धिको संकल्प गरेका छौँ, त्यसका लागि विज्ञहरुको सहयोग चाहिन्छ । घोषणापत्रमा उल्लेख गरिएका विषयलाई कार्यान्वयन गर्न तपाईहरुको खाँचो छ ।’
जोखिम मोलेर नै पार्टी एकताको प्रक्रिया अघि बढाएको उनको भनाइ थियो । 'कतिपयलाई एमाले–माओवादी एकताले आश्चर्य पनि लाग्यो होला, कतिपय विधि पनि हामीले तोड्यौं । तर, जतिसुकै राम्रो विधि अपनाए पनि निर्णय राम्रो भएन भने त्यसको कुनै अर्थ रहँदैन’ प्रचण्डले भने, 'अहिले हामीले गरेको निर्णय देशको पक्षमा छ, जनताको पक्षमा छ, राजनीतिक स्थिरता र विकासको पक्षमा छ । हामीले राजनीतिक भूमरिबाट देशलाई निकाल्ने संकल्प गरेका छौं । कसैले पार्टी एकता हुँदैन कि भन्ठानेको छ भने त्यो कल्पना मात्र हो । हामी छिट्टै एकता प्रक्रिया टुङ्गाउँछौं ।’
प्रतिक्रिया दिनुहोस !
