झापा क्वार्टरफाइनलमा
बिर्तामोड : आयोजक रमपम झापा-११ तेस्रो रमपम झापा गोल्डकप फुटबल प्रतियोगिताको क्वार्टरफाइनलमा प्रवेश गरेको छ । शनिबारबाट बिर्तामोडको डोमालाल राजवंशी रंगशालामा भएको उद्घाटन खेलमा सुदूरपश्चिम-११ लाई ५-० गोलले पराजित गर्दै झापा प्रतियोगिताको अन्तिम आठमा पुगेको हो ।
सुरुआतबाटै उत्कृष्ट प्रदर्शन गरेको झापाले ठूलो अन्तरको जित निकाल्न सफल भयो । झापाले खेलको पहिलो हाफमै अग्रता बनाएको थियो । खेल सुरु भएको छैटौं मिनेटमै देवेन्द्र तामाङले गोल गर्दै टोलीलाई १-० ले अघि राखेका थिए । स्ट्राइकर कर्ण लिम्बूको हेडिङ बारमा लागेर फर्केपछि देवेन्द्रले गोल गरेका थिए । त्यसलगत्तै भएको आत्मघाती गोलले घरेलु टोलीको अग्रता दोब्बर बन्यो ।
सुदूरका विष्णु चौधरीले क्लियर गर्न प्रहार गरेको बल झापाका विश्वास श्रेष्ठको शरीरमा लागेर गोलमा परिणत भएको थियो । त्यसपछि खेलको ३१औं मिनेटमा कर्णले गोल गर्दै टोलीलाई ३-० ले अघि बढाए । त्यसको १४ मिनेटपछि गिलसन कन्दङ्वाले गोल गर्दा झापाले पहिलो हाफमै ४-० को अग्रता बनाएको थियो । त्यसपछि खेलको ५२औं मिनेटमा कर्णले व्यक्तिगत दोस्रो गोल गरेपछि झापाको जित ५-० ले पक्का बनेको थियो । टोलीको जितमा दुई गोल गरेका कर्ण म्यान अफ दी म्याच चुनिए ।
शनिबारबाट सुरु भएको प्रतियोगितामा झापा र सुदूरपश्चिम-११ सँगै थ्रीस्टार, मनाङ मस्र्याङ्दी, सहारा क्लब पोखरा, रूपन्देही-११ र सिक्किम युनाइटेड एफसीसहित विभागीय टोलीहरू त्रिभुवन आर्मी, नेपाल पुलिस र एपीएफको सहभागिता छ । प्रतियोगिताको विजेता टोलीले १२ लाख ५१ हजार तथा उपविजेता टोलीले ६ लाख रुपैयाँ प्राप्त गर्ने आयोजकले जनाएको छ । यस्तै यसपटक प्रतियोगिताका उत्कृष्ट दुई खेलाडीलाई मोटरसाइकलले पुरस्कृत गरिने पनि आयोजकले जनाएको छ
प्रतियोगिता उद्घाटनका अवसरमा पुराना दुई खेलाडीलाई पुरस्कृतसमेत गरिएको छ । आयोजकले पुराना फुटबलर रामदर्शन गुरुङ र सन्तबहादुर रायमाझीलाई जनही २५ हजार रुपैयाँसहित सम्मान गरेको हो । प्रदेश १ का मुख्यमन्त्री शेरधन राईले खेलाडीद्वयलाई सम्मान गरेका थिए।