विशेष बन्यो पहिलो जित
काठमाडौं : पपुवा न्युगिनी (पीएनजी) विरुद्ध एकदिवसीय क्रिकेटमा पहिलो जित निकालेसँगै नेपालले एकदिवसीय टोलीको मान्यता प्राप्त गर्दै ऐतिहासिक उपलब्धि हात पारेको छ । उत्कृष्ट बलिङसँगै संयमित ब्याटिङ प्रदर्शन गरेको नेपालले पीएनजीलाई ६ विकेटले पराजित गर्यो । नेपालले यो जितसँगै पीएनजीविरुद्ध अघिल्ला खेलमा बेहोरेको पराजयको बदला समेत लिएको छ । अन्तर्राष्ट्रिय क्रिकेट काउन्सिल (आईसीसी) विश्व क्रिकेट लिग च्याम्पियनसिपअन्तर्गत सन् २०१५ को अन्त्यतिर पीएनजीविरुद्ध भएको दुई खेलमध्ये नेपालले दुवै खेल गुमाएको थियो । दुबईमा भएको पहिलो खेलमा नेपाल दुई विकेट र दोस्रो खेलमा तीन विकेटले पराजित भएको थियो ।
जिम्बावेको राजधानी हरारेस्थित वल्र्ड हरारियन स्टेडियममा टस जितेर पहिले फिल्डिङ रोजेको नेपालले पीएनजीलाई २७.२ ओभरमा एक सय १४ रनको सामान्य योगफलमै समेटेको थियो । जवाफमा आएको नेपालले २३ ओभरमै केवल चार विकेट गुमाएर जित पक्का गरेको थियो । नेपाललाई महत्वपूर्ण खेलमा जित दिलाउन अलराउन्डर दीपेन्द्रसिंह ऐरीले बल र ब्याटबाट उत्कृष्ट प्रदर्शन गरे ।
अफ स्पिन बलिङ गरेका दीपेन्द्रले ४.२ ओभरमा मात्र १४ रन खर्चिएर चार विकेट लिए । उनले ब्याटिङमा पनि अविजित ५० रनको योगदान गरे । उनले ५८ बलमा तीन छक्का र एक चौका प्रहार गरे । दीपेन्द्रले २३औं ओभरको अन्तिम बलमा छक्कासहित आफ्नो अर्धशतक पूरा गर्दै नेपालको जित पनि पक्का गरे । दीपेन्द्रले चौथो विकेटका लागि आरीफ शेखसँग ६७ रनको महत्वपूर्ण साझेदारी गरेका थिए । आरिफ ४२ बलमा २६ रन बनाउँदै आउट भए ।
त्यसअघि नेपालका सुरुवाती बलरहरुले पीएनजीका सुरुवाती ब्याट्सम्यानलाई चाँडै आउट गर्दा नेपालले सहज लक्ष्य पाएको थियो । पीएनजीका लागि चाल्र्स अमिनीले १९ रन बनाए । नेपाली युवा लेग स्पिनर सन्दीप लामिछानेले पीएनजीको चार तथा करण केसी र सोमपाल कामीले एक÷एक विकेट लिए । नेपालले अब शनिबार सातौं स्थानका लागि नेदरल्यान्ड्सको सामना गर्नेछ ।
‘सबैले खुसी मनाउनु पर्छ’
-विनोद दास
नेपाली टोलीले प्राप्त गरेको यो उपलब्धिमा म निकै खुसी छु । नेपाली क्रिकेटले हालसम्म प्राप्त गरेकोमध्ये यो सबैभन्दा ठूलो उपलब्धि हो । त्यसैले यो उपलब्धिमा सबैले खुसी मनाउनु पर्छ । वर्षाैंको मेहनतपछि प्राप्त यो खुसीसँगै नेपाली क्रिकेटमा अझ बढी जिम्मेवारी पनि थपिएको छ । यदि ती जिम्मेवारीलाई सही ढंगले सदुपयोग गर्न सकेको अवस्थामा नेपाली क्रिकेटले आगामी चार वर्षमा साँच्चिकै ठूलो उपलब्धि हात पार्नेछ ।
म खेलाडी हुँदा पनि मेरो देशले एकदिवसीय मान्यता प्राप्त गरोस् भनेर सोच्ने गर्थें । यसैगरी टेस्ट मान्यताको विषयमा पनि हामी सोच्थ्यौं । म आफंै पनि यो सफलताका लागि लालायित थिएँ । अहिले खेलाडीबाट प्रशिक्षकको जिम्मेवारीमा छु । नेपाली टोलीले पहिलो पटक एकदिवसीय टोलीको मान्यता प्राप्त गर्न सफल भएको छ । यो अवस्थामा म खेलाडीको रूपमा जति खुसी हुन्थेँ हुँला, अहिले नेपाली क्रिकेटको समर्थक र प्रशिक्षकको हैसियतमा पनि उत्तिकै खुसी छु ।
(विनोद राष्ट्रिय टोलीका पूर्वकप्तान हुन् ।)
प्रतिक्रिया दिनुहोस !
