काठमाडौं : त्रिभुवन आर्मी क्लबका प्रणव खनाल र नेपाल पुलिस क्लबका कमल भण्डारीको जोडी १०औं सहवीर स्मृति खुला लनटेनिस प्रतियोगितामा पुरुष युगलतर्फ च्याम्पियन बनेको छ । हल्चोकमा बिहीबार भएको फाइनलमा उक्त जोडीले ललितपुरका सन्तोष खत्री र जितेन्द्र परियारको जोडीलाई ४-६, ६-४, १०-५ अंकले पराजित गर्यो । इन्टर गभर्मेन्टल सर्भिस स्पर्धाको पुरुष एकलतर्फको फाइनलमा एपीएफका सुरजकुमार श्रेष्ठले आर्मीका उत्तम बोगटीलाई ६-३, ७-५ अंकले हराउँदै उपाधि हात पारे ।
यसैगरी ३५ वर्षमाथिको भेन्ट्रान्स युगलतर्फ काठमाडौंका महेश श्रेष्ठ र छेवाङ लामाको जोडीले बाजी मार्यो । महेश र छेवाङको जोडीले फाइनलमा काठमाडौंका विमल गुरुङ र राजु क्षेत्रीको जोडीलाई ७-५, ६-० अंकले हरायो । ४५ वर्षमाथि भेन्ट्रान्स युगलतर्फको फाइनलमा काठमाडौंका सुवर्ण ढाक्वा र कृष्णराज घलेको जोडीले काठमाडौंकै राजु क्षेत्री र शिवप्रसाद सेढाईंको जोडीलाई ६-३, ६-३ अंकले हराउँदै पहिलो भयो । ४५ वर्षमाथिको भेन्ट्रान्स एकलतर्फ काठमाडौंका राजु श्रेष्ठ पहिलो भए । फाइनलमा राजुले काठमाडौंकै सिजर गुरुङलाई ६-२, ३-२ अंकले हराए ।
रत्नजित र नवीनको जोडी च्याम्पियन
त्रिभुवन आर्मी क्लबका रत्नजित तामाङ र नवीन श्रेष्ठको जोडी १४औं कृष्णमोहन स्मृति राष्ट्रिय खुला ब्याडमिन्टन प्रतियोगितामा पुरुष युगलतर्फको उपाधि जितेका छन् । हल्चोकस्थित एपीएफ क्लबको कभर्डहलमा बिहीबार भएको फाइनलमा रत्नजित र नवीनको जोडीले एपीएफ क्लबका दिपेश धामी र विजित थापामगरको जोडीलाई २१-१६, १९-२१, २२- २० ले पराजित गरे । १७ वर्षमुनी पुरुष एकलतर्फको फाइनलमा दार्चुलाका प्रिन्स दाहालले आर्मीका प्रफुल्ल महर्जनलाई २१-१४, २१-१९ ले हराउँदै उपाधि जिते । महिला युगलतर्फ एपीएफकी पुजा श्रेष्ठ र शिक्षा श्रेष्ठको जोडीले आर्मीका नङसल तामाङ र अनुमाया राईको जोडीलाई २१-२३, २१-१४, २१-१६ ले हराउँदै पहिलो भए ।
४५ वर्षमाथि भेन्ट्रान्स युगलतर्फ जेष्ठ ब्याडमिन्टन एकेडेमीका नविनबावु श्रेष्ठ र श्याम पराजुली पहिलो भए । उक्त जोडीले ग्यालेक्सी क्लबका राजु भुजु र हरिप्रसाद श्रेष्ठको जोडीलाई २१-१७, २१-१७ ले पराजित गरे । मिक्स डबल्सतर्फ एपीएफका पुजा श्रेष्ठ र दिपेश धामीको जोडी पहिलो भए । उक्त जोडीले आर्मीका नङसल तामाङ र रत्नजित तामाङको जोडीलाई १७-२१, २१-१९, २१-१७ ले हराए । प्रतियोगिता अन्तर्गत पुरुष एकलको फाइनल खेलमा सुक्रबार एपीएफका दिपेश धामी र आर्मीका रत्नजित तामाङ भिड्नेछन् ।
न्युडायमन्ड र एपीएफबीच फाइनल भिडन्त
सशस्त्र प्रहरी महानिरीक्षक पाँचौं राष्ट्रिय खुला महिला भलिबल प्रतियोगिताको उपाधिका लागि शिवम् न्युडायमन्ड एकेडेमी काठमाडौं र नेपाल एपीएफ क्लबबीच भिडन्त हुने भएको छ । हल्चोकस्थित एपीएफ क्लबको कोर्टमा बिहीबार भएको खेलमा न्युडायमन्ड एकेडेमीले नेपाल पुलिस क्लबलाई २५-१०, २५-२२, २५-१३ को सोझो सेटमा पराजित गर्यो । उक्त खेलमा न्युडायमन्ड एकेडेमीकी प्रतिभा माली वुमन अफ दी म्याच घोषित भइन् । अर्को सेमिफाइनल खेलमा एपीएफ क्लबले त्रिभुवन आर्मी क्लबलाई २५-९, २५-९, २५-१० को सोझो सेटमा हरायो । उक्त खेलमा एपीएफकी नेविका चौधरी वुमन अफ दी म्याच भइन् ।
प्रतियोगितामा ६ टोलीले भाग लिएका थिए । लिग कम नकआउटका आधारमा सञ्चालित प्रतियोगिताबाट समूहका दुई शीर्ष टोली सेमिफाइनलमा पुगेका थिए । प्रतियोगिताको विजेता टोलीले दुई लाख ५० हजार र उपविजेताले एक लाख २५ हजार रुपैयाँ पुरस्कार प्राप्त गर्नेछन् । तेस्रो हुने टोलीले ५० हजार, उत्कृष्ट विधाका खेलाडीले जनही पाँच हजार र सर्वोत्कृष्ट खेलाडीले एउटा स्कुटर पुरस्कार प्राप्त गर्नेछन् ।
प्रतिक्रिया दिनुहोस !
