एक सय ४७ विद्यार्थी एसईई परीक्षाबाट वञ्चित
गाईघाट : आगामी चैत्र ८ गतेबाट सुरु हुने एसईई परीक्षामा उदयपुरका एक सय ४७ विद्यार्थी परीक्षा दिनबाट वञ्चित हुने भएका छन् । विद्यालयमा हाजिरी नपुगेका कारण उनीहरु परीक्षा दिनबाट वञ्चित भएका हुन् ।
उदयपुरका जिल्ला शिक्षा अधिकारी हरिहर धितालले शिक्षा नियमावलीअनुसार विद्यार्थीले परीक्षामा सहभागी हुन नपाउने बताउँदै भने, ‘शिक्षा नियमावली अनुसार विद्यार्थीको ७५ प्रतिशत हाजिर हुन पर्छ । नियमावली अनुसार प्रकृया पुरा नगरेकाले उनीहरुलाई परीक्षा दिनबाट वञ्चित गराइएको हो ।’
यस वर्ष नियमिततर्फ पाँच हजार ९९ जना परीक्षार्थी सहभागी हुँदैछन् । जसमा छात्रा दुई हजार ६ सय ९१ र छात्र दुई हजार चार सय आठ जना रहेका छन् । त्यस्तै एक्जाम्टेडतर्फ पाँच सय ६१ र प्राविधिक विषयतर्फबाट एक सय ३९ छन् ।
उदयपुरमा सामुदायिक, संस्थागत, प्राविधिक, एक्जाम्टेडतर्फका विद्यार्थीका लागि २५ परीक्षा केन्द्र तोकिएको छ । जसमा प्राविधिक तर्फको परीक्षा त्रियुगा नगरपालिकाको देउरी माध्यमिक विद्यालय तोकिएको छ भने एक्जामटेडका लागि सदरमुकामस्थित त्रियुगा मावि गाईघाट र राजवास मावि तोकिएको छ ।
२५ परीक्षा केन्द्रमध्ये मुकुर्ची मावि, रिस्कु मावि र नारदआर्दश माविमा महिला परीक्षा केन्द्राध्यक्ष तोकिएको जिशिअ धितालले बताए । परीक्षा सञ्चालनका लागि केन्द्राध्यक्ष २५, सहकेन्द्राध्यक्ष २७, निरीक्षक दुई सय ४६ सहयोगी एक सय ३२ तोकिएको छ ।
परीक्षाको सम्पुर्ण तयारी सकिएको बताउँदै उनले भने, ‘गत वर्षको तुलनामा यस वर्ष उदयपुरमा एसईई परीक्षा दिने विद्यार्थीको संख्या घटेको छ ।’