आईपीएलः कोलकातासँग दिल्ली ७१ रनले पराजित, सन्दीपले मौका पाएनन्
काठमाडौँः इन्डियन प्रिमियर लिग (आईपीएल) अन्तरगत आज राति भएको खेलमा कोलकाता नाइट राइडर्सले दिल्ली डेयर डेभिल्सलाई फराकिलो हारको स्वाद चखाएको छ ।
इडेन गार्डेनमा भएको भिडन्तमा २०१ रनको चुनौती पछ्याएको दिल्ली १४.२ ओभरमै अलआउट हुँदै १२९ रनमा समेटिएपछि ७१ रनको पराजय भोग्न बाध्य भएको हो ।
दिल्लीका लागि गेलेन म्याक्सवेलले २२ बलमा सर्वाधिक ४७ रनको योगदान दिए । त्यसैगरी रिसभ पन्तले २६ बलमा ४३ रन जोडे । दिल्लीका कप्तान गौतम गम्भीरको पूर्वक्लबविरुद्धको प्रदर्शन विसर्न लायक रह्यो । उनले ७ बलमा ८ रन मात्रै जोड्दै पेभेलियन फर्किए ।
दिल्लीको तर्फबाट आजको खेलमा पनि नेपाली युवा स्पिनर सन्दीप लामिछानेले अवसर पाउन सकेनन् । दिल्लीका अन्य बलर पनि कोलकातालाई ठुलो स्कोर बनाउनबाट रोक्न असफल रहे । कोलकाताका लागि कुलदीप यादव र सुनिल नारिनले समान तीन–तीन विकेट लिन सफल भए ।
यसअघि पहिले ब्याटिङ गरेको कोलकाताले घरेलु मैदानमा पुरै २० ओभर खेल्दै २०० रन बनाएको थियो । यो स्कोरका लागि नितिश रानाले सर्वाधिक ५९ रन बनाए । आन्द्रे रसेलले ४१ र रभिन उथप्पाले ३५ रनको योगदान दिए । क्रिसले लेएनको नाममा ३१ रन रह्यो ।
पराजित दिल्लीका लागि राहुल टिवैटाले ३ विकेट लिन सफल भए । त्यसैगरी बोउल्ट र क्रिस मोरिसको नाममा २–२ विकेट रह्यो ।
दिल्लीको यो तेस्रो हार हो । चार खेल खेलेको दिल्ली ३ खेलमा हार र १ मा जित निकाल्दै २ अंकसहित तालिकाको पुच्छरबाट दोस्रो स्थानमा छ । सबैभन्दा पुच्छरमा मुम्बई इन्डियन्स सबै तीन खेल गुमाउँदै अंकविहीन छ ।
प्रतिक्रिया दिनुहोस !
