राजविराज : हावाहुरीसहित बुधबार विहान आएको असिनापानीले सप्तरीको विभिन्न ठाउँमा आँप, लिच्ची र तरकारी बालीमा क्षति पुगेको छ ।हावाहुरीसँगै आएको असिनापानीका कारण सप्तरीमा मात्र एक करोड मूल्य बराबरको तरकारी, आँप र लिच्चीमा क्षति पुगेको जिल्ला कृषी कार्यालयको प्रारम्भिक अनुमान छ । असिना र हुरीले आँपका चिचिला झारेर ठूलो क्षति पुर्याएको कृषि विकास कार्यालयका प्रमुख भागिरथ यादवले बताएका छन् ।
जिल्ला प्रहरी कार्यालका प्रमुख प्रहरी उपरीक्षक मुकेशकुमार सिंहका अनुसार रुपनी गाउँपालिका १ की सावित्रीदेबी यादवको घरको टिनको छाना उडाएर उनी घाइते भएकी छिन् । खुट्टामा चोट लागेर घाइते भएकी उनको स्थानीय मेडिकलमा उपचार भइरहेको छोरा दिनेश यादवले बताए ।
यसैगरी सप्तकोशी नगरपालिका ८ स्थित पुष्पाञ्जली बोर्डिङ्ग स्कुलको छाना उडाएको छ । बाँसको टाँटीको बेरा र टिनको छानो भएको बिद्यालयको ११ वटा कक्षा कोठाको छाना उडाउँदा सात लाख मूल्य बराबरको क्षति भएको सप्तरी प्रहरीले जनाएको छ ।
सप्तकोशी नगरपालिका ९ का सुर्यनारायण यादवको कुखुरासहितको फर्म उडाउँदा चार सय चल्लाको मृत्यु भएको यादवले इलाका प्रहरी कार्यालय कञ्चनपुरले जनाएको छ । फर्म र चल्लाको क्षतिले तीन लाख मूल्य बराबरको नोक्सान भएको यादवले बताए ।हावाहुरीलेले सडका किनारका रुखहरु ढलेर सडक अवरुद्ध बनाएको तथा फुस र टिनको छानो भएका घरहरु उडाएको स्थानीयले बताएका छन् ।
अवरुद्ध पूर्व–पश्चिम राजमार्गमा ढलेका रुखहरु हटाएर प्रहरीले यातायात सुचारु गराएको छ । हनुमाननगर कंकालिनी नगरपालिका १० स्थित राजविराज–हनुमाननगर सडक खण्डमा राजविराजबाट हनुमाननगरतर्फ जाँदै गरेको स.७ प १२९६ नम्बरको मोटरसाइकल हावाहुरीका कारण अनियन्त्रित भई साइकल यात्रीलाई ठक्कर दिएको छ ।
ठक्करले हनुमाननगरतर्फ जाँदै गरेको साइकल यात्री तिलाठी कोइलाडी गाउँपालिका ५का उमाशंकर साहको छोरा १२ वर्षीय रामकुमार साह घाइते भएका छन् । सप्तकोशी बोर्डि्ग स्कुलमा अध्ययनरत साहको टाउको र हातमा गम्भिर चोट लागेको छ । उनलाई उपचारका लागि नोबेल अस्पताल बिराटनगर लगिएको इलाका प्रहरी कार्यालय हनुमाननगरले जानकारी दिएको छ ।
इलाका प्रहरी कार्यालय हनुमाननगरले मोटरसाइकल नियन्त्रणमा लिएको र फरार चालक हनुमाननगर कंकालिनी नगरपालिका १० का १९ वर्षीय अनील मण्डलको खोजी गरिरहेको जनाएको छ ।
प्रतिक्रिया दिनुहोस !
