जनकपुरः भारतीय प्रधानमन्त्री नरेन्द्र मोदीको आगमनको दिन नजिकिँदै गर्दा जनकपुरमा सुरक्षा व्यवस्था अत्यन्त कडा बनाइएको छ ।
बुधबार साँझदेखि जनकपुर नगर क्षेत्रमा नेपाली र भारतीय सुरक्षाकर्मीको उपस्थिति बाक्लो बनाइएको छ । यहाँको प्रसिद्ध जानकी मन्दिर र मोदीको स्वागतका लागि तयार पारिएको रंगभूमि मैदानमा करिब अढाई सय भारतीय फौज तैनाथ भएका छन् ।
जानकी मन्दिर र रंगभूमि बाह्र बिघा मैदानलाई भारतीय फौजले नियन्त्रणमा लिएसँगै सर्वसाधरणलाई प्रवेशमा निषेध गरिएको छ । मोदी आउने भएपछि २५ जना कमाण्डोको टोलीले भारतीय सेनाको जहाजबाट दुई दिन अघि जनकपुर उत्रिसकेको छ ।
त्यसअघि नै २ सय भन्दा धेरै भारतीय प्रहरीको टोली सादा पोसाकमा जनकपुर आइसकेको छ । मोदी जाने दुई स्थानमा भारतीय सुरक्षाकर्मीले सुरक्षा अत्यन्त कडा बनाएका छन् । यता जनकपुर नगरका चोक चोक र गल्ली गल्लमा तैनाथ नेपाली सुरक्षाकर्मीले सर्वसाधरणमाथिको चेकजाँच कडा बनाउँदै लगेका छन् ।
जनकपुरको भानु चौकसहितका स्थानमा बुधबार साँझ सर्वसधारणलाई चेकजाँच कार्य सुरक्षाकर्मीले कडा बनाएका छन् । मोदी यही शुक्रबार जनकपुर आइपुग्दैछन् ।
मोदी आउने मिति नजिकिएसँगै उनले पूजा गर्ने जानकी मन्दिर र अभिनन्दनस्थल रंगभूमि बाह्र विघा मैदानलार्इ भारतीय उच्च सुरक्षा अधिकारीले बुधबारबाट आफ्नो सुरक्षा कब्जामा लिएका हुन् ।
प्रतिक्रिया दिनुहोस !
