दुनै : डोल्पाको जगदुल्ला गाउँपालिकामा पहिलो पटक कर्णाली राजमार्गबाट जिप पुगेको छ । जुम्लाको सिमानामा पर्ने जगदुल्ला गाउँपालिकामा पहिलो पटक छिमेकी जिल्ला जुम्लाबाट जिप पुगेपछि खुसी हुँदै स्थानीयले स्वागत गरेका छन् ।
साविकको रिमी र काइगाउँ गाविस मिलेर बनेको जगदुल्ला गाउँपालिकामा कर्णाली राजमार्गमा जोडिने डोल्पाको पहिलो स्थानीय तह भएको जगदुल्ला गाउँपालिकाका अध्यक्ष नारासिंह रोकायाले बताए । उनले भने, ‘निकै ठूलो प्रयासबाट कर्णाली राजमार्गमा जगदुल्ला गाउँपालिकालाई जिप सञ्चालन गरेर जोडियो ।’ उनका अनुसार अबको केही महिनामा साना मालवाहक गाडी पनि सञ्चालनमा आउनेछन् ।
जुम्ला र डोल्पाको सिमानामा पर्ने मौरे लेखबाट त्रिपुराज्ञसुन्दरीसम्मको ७२ किलोमिटर सडकखण्ड निर्माणाधीन अवस्थामा छ । करिब ४६ किलोमिटर सडक निर्माण भइसकेकाले जुम्लाबाट सीधै जिप जगदुल्ला गाउँपालिकाको काइगाउँसम्म सञ्चालनमा ल्याएको निमित्त प्रमुख प्रशासकीय अधिकृत कमल बरुवालले बताए । उनले भने, ‘अब जगदुल्ला गाउँपालिकाका जनताले निकै सुपथ मूल्यमा दैनिक उपभोग्यवस्तु उपभोग गर्न पाउनेछन् ।’
जुम्लाबाट बा.१९च १६६८ नम्बरको जिप पहिलो पटक जगदुल्ला गाउँपालिका पुग्दा स्थानीयले स्वागत गरेका थिए । पहिलो पटक जिप हेर्नेको भीड लागेको स्थानीय हरिबहादुर शाहीले बताए ।
देश संघीयतामा गएसँगै पाँच वर्षमा सरकारले दिने बजेटबाट नमुना गाउँपालिका बनाउने र जगदुल्ला गाउँपालिकाका नागरिकले घरघरमा सरकार अर्थात् गाउँगाउँमा सिंहदरबारको अनुभूति गराउने गाउँपालिकाका अध्यक्ष नारासिंह रोकायाले दाबी गरे । सरकारले विकास गर अनि नागरिकलाई सेवा प्रदान गर भनेकै कारण जनताको हितअनुरूप काम गर्ने उनको भनाइ थियो ।
जगदुल्ला गाउँपालिकाका सबै वडामा सडक दुई महिनामा पु¥याउने र सञ्चार, शिक्षा, विद्युत्, यातायातलगायत सबै सेवा प्रभावकारी बनाउने अध्यक्ष रोकायाको प्रतिबद्धता छ । उनले भने, ‘जिप आउँदा त यति खुसी छन् भने सरकारले दिने सबै सेवा घरमा लिन पाए कति खुसी होलान् नागरिक ? ’ डोल्पा मात्र नभई देशकै नमुना गाउँपालिका बनाउने उनले दाबी गरे ।
प्रतिक्रिया दिनुहोस !
