फुङलिङ : ताप्लेजुङका निर्वाचन क्षेत्र नम्बर १ र २ छुट्याउने तमोर नदीमाथि झोलुंगे पुलसम्म नहुँदा फड्केबाट जोखिमपूर्ण यात्रा गर्नुपर्थ्यो । बिस्तारै झोलुंगे पुल बनेपछि सदरमुकाम फुङलिङ-गाउँ यात्रा सहज बन्दै गयो । अहिले भने तमोरमा मोटरेबल पुल बनाउने होड चलेको छ । दोभानबाट एक घण्टाको पैदल दूरीमा रहेको खोक्लिङसम्म चारवटा मोटरेबल पुल बन्ने भएका छन् ।
यहाँ प्रत्येक एक किलोमिटर दूरीमा करोडौं लागतमा पुल निर्माण प्रक्रिया अघि बढेको छ । सरकारको लगानीमा तीन र एउटा सानिमा हाइड्रोपावर कम्पनीमार्फत पुल बन्ने भएका छन् । नौ वर्षअघि निर्माण सुरु भएको फुङलिङ नगरपालिका र मेरिङ्देन गाउँपालिका जोड्ने पुलको काम अन्तिम चरणमा पुगेको छ । यसको ट्रस्ट जोड्ने काम भइसकेको छ । पुलमा रङ लगाउन र ढलान गर्न मात्र बाँकी रहेको पुल हेर्ने निकाय उत्तर-दक्षिण लोकमार्ग आयोजना प्रमुख कुवेर नेपालीले बताए ।
यो पुल असारदेखि सञ्चालनमा आउने जनाइएको छ । यो जिल्ला सदरमुकामसँग मेची र कोसी राजमार्ग जोड्ने पुलसमेत हो । भारत र तिब्बत जोड्ने तमोर करिडोरले पनि यही पुललाई प्रयोग गर्ने नेपालीको भनाइ छ ।
बाँकी तीनवटा भने फुङलिङ नगरपालिका र साबिकको खोक्लिङ गाविस जोड्ने पुल हुन् । यीमध्ये हान्द्रुङ र दगुर्नेमा सरकार र थुम्बामा सानिमा हाइड्रोपावरले पुल बनाउन लागेका हुन् । यी तीनै पुल वारिपारि नै एउटै सडकमा जोडिन्छन् ।
आफूले अनावश्यक भनेर विभागमा जानकारी गराए पनि जिल्लाबाटै आवश्यक भनेपछि निर्माण चरणमा रहेको हान्द्रुङको पुल हेर्ने पुल विभागका इन्जिनियर अर्जुन अर्यालले बताए । ‘मैले रातो किताबमा कार्यक्रम देखेपछि अनावश्यक भनेर जानकारी गराएको हुँ’, उनले भने, ‘ताप्लेजुङ जिल्ला समन्वय समितिमा जानकारी लिँदा दुवै आवश्यक हो भनेपछि निर्माण सुरु भएको छ ।’ यो बुझ्न दुई महिनासम्म होल्ड गरिएको उनको भनाइ छ ।
भ्याटबाहेक १० करोड लागतमा बन्न लागेको हान्द्रुङ पुलको जिम्मा शर्मा कन्स्ट्रक्सनले पाएको छ । स्थानीय निर्वाचनताका शिलान्यास तयारी भए पनि आचारसंहिताका कारण रोकिएको पुल निर्माण अहिले सुरु भइसकेको छ ।
दगुर्नेको पुलको काम पनि धमाधम भइरहेको छ । यसको पूर्वतर्फको पिलर निर्माण सुरु भएको छ भने पश्चिमतर्फको जग खन्ने काम भइरहेको छ । फुङलिङ नगरपालिका हाङदेवा र खोक्लिङको थुम्बाबेंसी जोड्ने पुल पनि केही महिनामै निर्माण सुरु हुने सानिमा हाइड्रोपावरले जनाएको छ।
एकै ठाउँमा धेरै पुल बन्न थालेपछि अनावश्यक भनेर यसको आलोचनासमेत भइरहेको छ । ‘पुल आवश्यक पर्ने ठाउँ धेरै छन्’, स्थानीय नवीन गुरागाईंले भने, ‘यहाँ खर्च गर्ने बजेट त्यस्ता ठाउँमा लगे राम्रो हुन्थ्यो ।’ हान्द्रुङ र दगुर्नेमध्ये कुनै एक ठाउँमा बन्ने पुल फक्ताङलुङ गाउँपालिकाको सिंवा र खेजेनिम वडा जोड्ने गरी बनाए उपयोगी हुने गाउँपालिका अध्यक्ष सरोज लिम्बूले बताए । ‘त्यहाँ अत्यावश्यक भएकाले राज्यले यसमा ध्यान दिनुपर्छ’, उनले भने । उक्त स्थानमा पुल निर्माणका लागि जिविसले दुई वर्षअघि चिनियाँ दूतावासलाई आग्रहसमेत गरेको थियो ।
प्रतिक्रिया दिनुहोस !
