जनकपुरधामः महोत्तरीको बलवा नगरपालिकास्थित रौजा मजार हिन्दु र मुस्लिम दुवै धर्म मान्नेहरुको साझा आस्थाको केन्द्र बन्दै गएको छ ।
जनकपुरदेखि १४ किलोमिटर पश्चिममा पर्ने रौजा मजार इश्लाम धर्मावलम्बीहरुको प्रमुख धार्मिकस्थल भए पनि हिन्दु धर्म मान्नेहरु पनि यहाँ दरगाहमा चादर चढाउन ठूलो संख्यामा पुग्ने गर्दछन् ।
दैनिक रुपमा भाकल गर्ने र भाकल पुरा भएपछि चादर चढाउने श्रद्धालुमा कुनै एक धर्मको मात्र नभई सबै धर्म मान्नेहरुको संख्या उल्लेख्य रहने गरेको मजार व्यवस्थापन समितिका मोहम्मद शोकत अलि खा बताउँछन् ।
‘यो पवित्र थलो हो जहाँ धर्मको कुनै छेकबार छैन । सबैले आफ्नो मनोकामना पुरा हुने आशाका साथ यहाँ आइपुग्छन्’, उनले भने, ‘आफ्नो भाकल पुरा भयो भने खुशीमा खशिको कुर्बानी दिने, कुखुरा चढाउने र केहीको क्षमता नभए लड्डु चढाएर पनि ईश्वरलाई धन्यवाद दिने गर्दछन् ।’
१५ औं शताब्दीमा मध्यपूूर्वबाट इश्लाम धर्मको प्रचारप्रसारका लागि नेपाल आएका प्रचारकहरु बाबा गदाअलि साह र उनका दुई अनुयायीहरु रहमन अलि साह र बारहअलि साहको समाधीस्थल हो रौजा मजार ।
ती प्रचारकहरुमा ईश्वरीय शक्ति भएको हुनाले उहाँहरु यस स्थानमा बसेपछि कसैलाई पनि दुःख विपत्त पर्दा समस्याको समाधान गरि दिने गर्थे ।
सोही आस्थाका कारण वर्तमानमा यस मजारमा आएर आफ्नो दुःखकष्ट अन्त्य हुने कामनाका साथ वर्षमा देश विदेशबाट लाखौं श्रद्धालुहरु यहाँ पुग्ने गर्दछन् ।
भारतको लौकहाबाट रौजा मजार गाडी भाडा गरि आइपुगेका श्रीचन मुखिया भन्छन्, ‘घरमा शुखशान्ति र छोरालाई राम्रो जागिर मिलोस् भन्ने कामनाका साथ दरगाहमा आएका छौं ।’
आफ्नो गाउँमा यो मजार निकै प्रसिद्ध भएको बताउँदै उनले छिमेकीहरुबाट यहाँको महत्व थाहा पाएपछि परिवारसहित घुम्न आइपुगेको उनको भनाई छ । ‘यदि भाकल पुरा भयो भने अर्को पटक चादर चढाउछौँ ।’
विशेषगरी निःसन्तान दम्पत्ति, मानसिक रोगबाट पीडित र अन्य शारीरिक समस्याबाट ग्रसित भएकाहरु डाक्टरको उपचारले रोग निको नभएर थाकेपछि यस दरगाहमा मनोकामना लिएर आइपुग्ने गरेको मौलानाहरु बताउँछन् । यहाँ भाकल गरेपछि अधिकांशको इच्छा पूर्ति हुने विश्वास छ ।
सडक, यातायात, बसोबासको उचित व्यवस्था नहुँदा टाढाबाट आउने धार्मिक पर्यटकसम्म दरगाहको महत्व अनुसार प्रचार गर्न नसकिएको स्थानीय बताउँछन् ।
प्रतिक्रिया दिनुहोस !
