मदिरा र जुवातासविरुद्ध महिलाको विद्रोह, वडा कार्यालयमा ताला
जेठ ८, २०७५ मंगलबार २३:२४:०
महेन्द्रनगरः मदिरा, जुवातास र लागूऔषधले समाजमा असर पुर्याएको भन्दै नियन्त्रण गर्नुपर्ने माग राख्दै महिलाहरु आन्दोलनमा उत्रिएका छन् ।
भीमदत्त नगरपालिका–८ का महिलाहरुले आन्दोलन थालेका हुन् । उनीहरुले वडा कार्यालयमा तालाबन्दी गरेका छन् । विभिन्न स्थानबाट आएका महिलाहरुले दिउँसो कार्यालयमा तालाबन्दी गरेका हुन् ।
उनीहरुले कार्यालयमा राखिएका सामाग्रीहरु बाहिर फ्याँकिदिएका छन् । उनीहरुले कार्यालयमा रहेका कुर्सी, टेबुल र सोफाहरु बाहिर ल्याएर फ्याँकिदिएका हुन् ।
मंगलबार भीमदत्त नगरपालिका–८ तिलाचौरका स्थानीय महिलाहरुले वडा कार्यालयमा तालाबन्दी गरेपछि वडा कार्यालयको कामकाज ठप्प भएको छ ।
‘स्थानीय सरकार गठन भएको वर्षदिन पुग्यो, अवैध मदिरा, जुवातास रोकिनुको साटो झन बढेको छ’ स्थानीय महिला गीता धानुकले भनिन्,‘ गाउँमा मदिराले निकै समस्या निम्त्याएको छ, यसको तत्काल बन्द हुनुपर्छ’ ।
गाँउमा अवैध मदिराको उत्पादन, कारोबार, अनियन्त्रित सेवनका कारण अपराध बढ्दै गएकाले मदिरा नियन्त्रणका लागि वडा सरकारलाई दबाब दिन तालाबन्दी गरिएको महिलाहरुले बताएका छन् । वडामा अवैध मदिरा, जुवातास र लागु औषध नियन्त्रण गर्नका लागि वडा सरकार उदाशिन देखिएको उनीहरुको आरोप छ ।
भीमदत्त नगरपालिका–८ का वडा अध्यक्ष ध्वजबहादुर विष्टले मदिरा, जुवातास र लागु औषधले समाजमा असर पारेको विषयमा महिलाहरुले आन्दोलन गर्नु जायज भएको बताए । उनले वडामा भइरहेका अपराधनका गतिविधि रोक्नका लागि आफूले पहल गरिरहेको बताए ।
‘वडा कार्यालयले घरेलु मदिरा, जुवातास र लागु औषध नियन्त्रणका लागि कार्ययोजना बनाउदै छ’ उनले भने, ‘अब कडाईका साथ हामी अघि बढ्ने छौं’ ।
मदिरा पिएर दिनुहँ घरमा घरेलु हिंसाको सिकार हुन बाध्य भएको महिलाहरुले बताए । ‘महिलाहरुले दिनहुँ घरमा गाली बेइज्जत सहनुपरेको छ, कुटाईसमेत खानुपर्ने अवस्था छ’ स्थानीय लक्ष्मी खडायतले भनिन्, ‘यो आन्दोलन हामीले समाज सुधार गर्नका लागि सुरु गरेका हौं’ ।
उनले वडामा तत्काल मदिरा बन्द गरिनुपर्ने माग गरिन । मदिरा, जुवातास र लागूऔषधका कारण सबैभन्दा बढी असर महिलामा पुगेको उनीहरुको दुखेसो छ ।
सार्वजनिक क्षेत्रमा धुमपान, मदिरा सेवनका साथै जुवातास खेल्ने प्रवृतिका कारण बालबालिकामा समेत त्यसले असर पुर्याएको उनीहरुले बताए । स्थानीय महिलाले गाउँमा शान्ति सुरक्षा कायम गर्नका लागि नियमित गस्ती गरिदिन समेत प्रहरीसँग माग गरेका छन् ।
प्रतिक्रिया दिनुहोस !
