काठमाडौं : नेपाली सेना र चिनियाँ जनमुक्ति सेनाको संयुक्त सैन्य अभ्यास ‘सगरमाथा फ्रेन्डसिप’को दोस्रो संस्करण प्रधानमन्त्री केपी ओलीको चीन भ्रमणपछि हुने भएको छ । गत वर्ष वैशाख ३ देखि १२ गतेसम्म महाराजगन्जस्थित विशेष वाहिनीमा दुई देशका विशेष सेनाले सैन्य अभ्यास गरेका थिए । संयुक्त अभ्यास प्रधानमन्त्री ओलीको असार ५ मा हुने चीन भ्रमणले पछि सरेको हो ।
संयुक्त सैन्य अभ्यासको दोस्रो संस्करण चीनमा हुने अनुमान गरिए पनि यसबारे दुवै पक्षले कुनै जानकारी दिएका छैनन् । सेनाले संयुक्त सैन्य अभ्यासको तयारी भइरहेको जानकारी मात्र दिएको छ । ‘सैन्य अभ्यासबारे दुवै देशका सैन्य अधिकारीबीच छलफल भइरहेको छ’, सैनिक प्रवक्ता गोकुल भण्डारीले भने, ‘सैन्य अभ्यास रोकिएको छैन । दुवै पक्ष आन्तरिक तयारीमा जुटेका छन् तर मिति तय भइसकेको छैन ।’
प्रधानमन्त्री ओली औपचारिक चीन भ्रमणमा असार पहिलो साता सिचुवान प्रान्त हुँदै बेइजिङ जाँदैछन् । उनको भ्रमणपछि नै दुई देशका सेनाको संयुक्त अभ्यास हुने रक्षा मन्त्रालय स्रोतले समेत जानकारी दिएको छ । दुई देशको संयुक्त सैन्य अभ्यासका लागि नेपालस्थित चिनियाँ दूतावासका अधिकारी, रक्षा मन्त्रालय र सेनाका वरिष्ठ अधिकारीबीच निकैपल्ट छलफल भइसकेको समेत स्रोतको दाबी छ । दुवै पक्षले सैन्य अभ्यासको मिति, स्थान र रूपरेखा (मोडालिटी) टुंगो लगाउने तयारी गरिरहेका छन् ।
आतंकवादबाट उत्पन्न हुन सक्ने सम्भावित सुरक्षा चुनौती दृष्टिगत गरी दुवै देशका विशेष सेनाले गत वर्ष पहिलो पटक संयुक्त सैन्य अभ्यास गरेका थिए । दोस्रो संस्करणका लागि नेपाली-चिनियाँ सेनाले प्रतिआतंकवाद युद्धकला र विपद् व्यवस्थापनमा केन्द्रित संयुक्त अभ्यासको तयारी गरिरहेको उच्च सैनिक स्रोतले जानकारी दिएको छ ।
सेनाले सैन्य कूटनीतिका माध्यमबाट मित्रराष्ट्रका सैनिक संगठनसँग द्विपक्षीय सम्बन्ध प्रगाढ बनाउन संयुक्त सैन्य अभ्यास गर्दै आएको छ । गत वर्ष भएको चिनियाँ-नेपाली सेनाको संयुक्त अभ्यासलाई भारत, अमेरिकालगायत कतिपय देशले असहज रूपमा लिए पनि सेनाले चीनसँगको सैनिक अभ्यास सामान्य र नियमित भएको जनाएको थियो । नेपाली-चिनियाँ सेनाको पहिलो संयुक्त सैन्य अभ्यासलाई ‘सगरमाथा फ्रेन्डसिप—२०१७’ नाम दिइएको थियो । गत वर्ष चिनियाँ जनमुक्ति सेनाका कर्नेल याङ सुमेङको नेतृत्वमा २२ सदस्यीय टोली संयुक्त सैन्य अभ्यासका लागि काठमाडौं आएको थियो ।
सेनाले पछिल्लो समय द्विपक्षीय तथा बहुराष्ट्रिय सैनिक तालिम र अभ्यासका माध्यमबाट सैन्य कूटनीति सुदृढ पार्दै आएको छ । सेनाले र अमेरिकी सेनासँग समेत संयुक्त सैन्य अभ्यास गर्दै आएको छ । त्यस्तै नेपाली-भारतीय सैनिकको संयुक्त सैन्य अभ्यास ‘एक्सरसाइज सूर्यकिरण’को १२ औं संस्करण गत भदौ अन्तिम साता रूपन्देहीको सालझण्डीस्थित सेनाको ब्याटल स्कुलमा भएको थियो ।
प्रतिक्रिया दिनुहोस !
